Génesis

47 Aramaʉ̃ta Josébara paraon’a jara wãsi: «Mʉ̃ zezeta akʉza mʉ̃ mebẽrãta drʉa Canaáneba zebʉda ãyi obeja eda, paka eda akʉza ãya nek’ãrẽ jõma bia erbʉ eda. Ãyira panʉ drʉa Goséne». 2 Maʉ̃ k’area Josébara yi mebẽrã juesoma jida k’ãrãpe wãsida paraon’a ũdubita. 3 Paraonbara José mebẽrã widisi: «¿Marara k’ãrẽta opanʉpe?». Ãya panʉsida: «Dai, bʉ nezok’ara obeja akʉbarira, dai zõrãrãba obada kĩrãk’a». 4 Adewara jarasida paraon’a: «Daira naʉ̃ drʉa eda zebʉda jãpeba zeda kĩrãk’a b’aita, drʉa Canaáne mejãcha jarrabatabʉ baera akʉza neẽ chiruata nedʉwʉrʉraita. Dai bia ok’ãrãpe, bʉ nezok’ara babira drʉa Goséne». 5 Paraonba jarasi José’a: «Bʉ zezeta bʉ mebẽrãta zebʉrʉ bʉme ãba b’aita. 6 Egipto drʉa bʉa obʉrʉde ora. Edera bʉ zezeta akʉza bʉ mebẽrãta drʉa audre bi’ia bʉmae. Babira drʉa Goséne. Bʉa k’awuabʉbʉrʉ ãyidebemata nedʉwʉrʉra saʉ̃ba audre bia akʉbʉta, akʉbira mʉ̃ pakarata». 7 Maʉ̃are Josébara yi zeze Jacobta edesi paraon’a ũdubita. Jacob’bara paraon ʉ̃rʉ bed’ea biata jarasi. 8 Paraonbara widisi Jacob’a: «¿Sõbe paogabʉ bʉra?». 9 Jacob’ba panʉsi paraon’a: «Mʉ̃ra ode wã abarita 130 paogaba. Maʉ̃ poaga mawũã berabaribʉrʉra mejãcha zareabasi mʉ̃itara, mawũãsidu naʉ̃ poagara wiñabʉ mʉ̃ zõrãrãenabema ode wãbadaira». 10 Maʉ̃ berabarida tẽã, Jacob’ba bed’ea biata jarasi paraon ʉ̃rʉ, maʉ̃ tẽã wãsi iyimaeba. 11 Mawũã Josébara yi zezeta akʉza yi mebẽrãta Egipto drʉade bʉsi, mama drʉa biata diasi, drʉa Ramesésde, paraonba jarada kĩrãk’a. 12 Josébara yi zezera akʉsi akʉza yi mebẽrãsida adewara yi zeze mebẽrã jõma, mama yiko diabasi ãya wũãwũã erbʉde. 13 Maʉ̃ tẽã, neẽbasi yikora maʉ̃ pʉwʉrʉdera, jarrabara arigʉbasi baera. Egipto drʉara jõma bera makosi jarrababa adewara Canaán drʉasida. 14 Josébara jõma jidasi plata Egiptodebemaneta akʉza Canaánebemaneta ẽbẽrarãba yikobari pagapananata maʉ̃ta paraon deda edebasi. 15 Ewari berabari wãne plata jõsi drʉa Egiptode akʉza drʉa Canaáne. Aramaʉ̃ta jõma egipsiorãra wãsida Joséidu mõbe jarasida: «Dai’a yiko diarua, ¿bʉara idu beibika dai plata jõsi baera?». 16 Joséba jarasi: «Marata plata neẽbidabʉrʉ, weidua mara pakarata maʉ̃bari mʉ̃a yiko diaya». 17 Ãyara maʉ̃ k’area ede jʉ̃drʉsida pakarata. Mawũã Josébara yiko diabasi ãyi kabayorabari, obejarabari, pakarabari, burrurabari. Maʉ̃ poagadera Josébara yikora diasi maʉ̃ra nedʉwʉrʉrabari. 19 ¿Daira idu beibika akʉza dai drʉara idu aduabika? Daita edara akʉza dai drʉasida, maʉ̃bari dai’a yikota diara. Daira paraon nezok’abaya adewara dai drʉa iyidebaya. Dai’a diara yitata daiba uita mawũã bei ẽ baita akʉza dai drʉara doba amae ẽ baita». 20 Jarrababa mejãcha zʉbʉrianʉmina baera, egipsiorabara nedo bʉesida ãyi drʉata mawũã Josébara ãyi drʉa jõma edasi paraon’ita. Maʉ̃ k’area drʉara jõma paraonebasi. 23 Aramaʉ̃ta Joséba jarasi ẽbẽrarã’a: «Akʉidua mʉ̃a marara idi edabʉrʉa akʉza mara drʉasida paraon’ita. Zachua mara yitara ne umarẽã mara drʉade. 24 Maraba ne uda jʉrepebʉrʉdera, dradaibara aba diata paraon’a. Yi kimarera maranebayi ne udamarẽã mayi drʉade mawũã mara nekoita akʉza mara dedapanʉta adewara mara wũãwũãrasida». 25 Maʉ̃ k’area ãya jarasida: «Nok’o, dai bebʉta k’arebabʉrʉa. Bʉita bigabʉrʉ daira paraon nezok’a baseabʉa».