Levítico

10 Maʉ̃ tẽã, Nadab’ba Abihú’ʉ̃meba (Aarón wũãwũãra) jidasida epedeko zaketa, maʉ̃ ʉ̃rʉ bʉesida tʉbʉ pʉreata akʉza insiensota, maʉ̃ tʉbʉ pʉreara Jeowa nãã ũdubisida, iya zok’ada ẽãta. 2 Aramaʉ̃ta Jeowadeba tʉbʉ pʉrea zedaba ãyira ba wãsi, maʉ̃ba ba wã k’ãrãpe Jeowa nãã beisi. 3  Moisésba jarasi Aarón’a: «Naʉ̃ta Jeowaba jarabʉrʉa: Yi mʉ̃ k’awa panʉra ũdubiyi neneẽãbʉta akʉza pʉwʉrʉra jõma ũdubiyi mʉ̃ zareata». Aarón’ra k’ãrẽ jara ẽ basi. 4 Moisésbara trʉ̃si Misaelta akʉza Elzafán’ʉ̃me, Uziel wũãwũãrata, Aarón yãbata mõbe jarasi: «Zeidua nainʉ. Ãĩ bʉeidua mara mebẽrãra namaʉ̃ba neneẽãbʉdeba mõbe maʉ̃ pʉwʉrʉdeba ãĩ edeidua». 5 Mõbe ãyira jʉ̃ẽ k’ãrãpe edesida beida kakuata yi wua eda mamaʉ̃ba pʉwʉrʉ ãĩ, Moisésba jarada kĩrãk’a. 6 Maʉ̃are Moisésba jarasi Aarón’a adewara yi wũãwũãra ũmebidara, Eleazar’a akʉza Itamar’a: «Maʉ̃ k’area wuata k’õaetarãra akʉza burusearãra, mawũã bei ẽ marẽã adewara Daizezeta pʉwʉrʉrabawara kĩrʉ ẽ marẽã. Mara mebẽrã jõma Israel dedabʉrãra jẽgayi Jeowaba tʉbʉ pʉreaba beada k’area. 7 Karpa de ãba yi jʉrebari eda wãbarideba jĩga wãraidua. Mawũã ẽ bʉrʉ marara beiyi, aseite neneẽãbʉ jidabarita Jeowadeta mara ʉ̃rʉbʉ baera». Mawũã ãyara Moisésba jarada kĩrãk’a osida. 8 Maʉ̃are Jeowaba jarasi Aarón’a: 9 «Bʉa mia bʉ wũãwũãrabida dobe ẽ binota mia ituata karpa de ãba yi jʉrebari eda wãbʉrʉde, mawũã bei ẽ baita. Naʉ̃ra ewari jõmaʉ̃nẽ omarẽã zok’abʉ ʉ̃rabʉrʉ zeiratabida. 10 Mawũã k’awuadai baera saʉ̃ta neneẽãbʉta akʉza saʉ̃ta Daizezedeba ze ẽãta, jaigʉa ẽãbʉta akʉza jaigʉabʉta akʉza jaradiara israelitara jõma Jeowaba Moisésdeba jaradata 11 akʉza jaradiara israelitara jõma Jeowaba Moisésdeba jaradata». 12 Aramaʉ̃ta Moisésba jarasi Aarón’a, Eleazar’a akʉza Itamar’a, yi wũãwũãra ũmebidara: «Oprenda netadebema eda chubidata Jeowa’a tʉbʉde diadapeadata, maʉ̃ra pan ne oreguea neẽãbʉ kĩrãk’a koibara altar k’awa, neneẽãbʉ baera. 13 Koibara neneẽãbʉmae, Jeowa’a oprendara tʉbʉde diapananata, maʉ̃ranebemata wiña bʉre akʉza bʉ wũãwũãrane, maʉ̃ta mʉ̃a omarẽã zok’asida baera.