Levítico
6 Jeowaba jarasi Moisés’a: 2 «Ẽbẽra abaʉta nemitia ora Daizeze nãã, iya wuaga jaradapeadata jẽda diamabʉba zrugrara maʉ̃ ẽbẽraneta, 3 iya ũdudata ũdu ẽãra, jarara iya oẽbasita nekayirua odata, maʉ̃ k’area naʉ̃ta odaibara: 4 maʉ̃ nekayiruata osibʉrʉ jẽda diaibara iya zrugadara, adewara iya sewada k’ãrãpe erbadata, iya wuaga erbedata akʉza iya ũduda ũdu ẽ bada jaradata; 5 iya oya adara oibara, iya mawũã erbadata jõma diaibara yibari’a, maʉ̃ awuara abarika diaibara iya jãrĩna kĩrãk’a, maʉ̃ranebemata juesoma zebi k’ãrãpe aba diaibara. Diaibara yi yibari’a k’awuabʉdade maʉ̃ba nemitia odata. 6 Jeowa’a diaibara iya oprenda nemitia oda k’area, saserdoteidu karnero neneẽãbʉta edeibara, maʉ̃ra iya zrʉgada kĩrãk’a abarika bale b’aibara. 7 Saserdotebara oyi mama iyira jaigʉa ẽ bamarẽã Jeowa nãã akʉza iya badu nekayiruaodata jẽda kĩrãduaseabʉ». 8 Jeowara Moisés’ʉ̃me bed’eabasi. Iya jarasi: 9 «Naʉ̃ta omarẽã jarada Aarón’a akʉza yi wũãwũãra: Naʉ̃ta yi ley oprenda bama k’area. Oprenda bamara altar ʉ̃rʉ b’aibara damasiduba ũnadrʉ zeyeda, maʉ̃ tʉbʉra pʉrea b’aibara maʉ̃ altarde kia ẽã. 10 Saserdotebara linoara wuata jʉ̃ibara. Adewara ãdia linoaradebemata jʉ̃ibara ãkadabʉ anaita. Maʉ̃are itarra oprenda bamanebemata ãĩ bʉeibara tʉbʉ pʉreaba ba bʉedata altar ʉ̃rʉ akʉza maʉ̃ta altar k’awa bʉeibara. 11 Iya wua nãã jʉ̃chuada wea k’ãrãpe awuruta jʉ̃ibara, mõbe maʉ̃ pʉwʉrʉ chuadadeba itarrara edeibara neneẽãbʉidu. 12 Maʉ̃ tʉbʉra pʉrea b’aibara maʉ̃ altarde. Kia ẽã. Diapedaza saserdotebara tʉbʉra ibalbʉenʉmaibara artarde, adewara maʉ̃ ʉ̃rʉ bʉeibara oprenda bamata akʉza draga sakripisio neneẽã erbaita chiwãbibara maʉ̃ ʉ̃rʉ. 13 Maʉ̃ tʉbʉra pʉrea b’aibara maʉ̃ altarde. Kia ẽã. 14 »Naʉ̃ta yi ley oprenda netadebemata. Aarón wũãwũãra, maraba naʉ̃ta Jeowa nãã ũdubibara altar kĩrãbita. 15 Maʉ̃nebema abaʉba oprenda netadebemata jidayi juwamaba arinarata aseite eda, adewara jõma olibano oprenda netadebema ʉ̃rʉbʉta, maʉ̃ra chiwãbibara altar ʉ̃rʉ, oprenda chiwã tũãbita Jeowaba ʉ̃kĩrãne. 16 Aarónba akʉza yi wũãwũãrabawaraʉba oprenda eda chubidata koibara. Maʉ̃ pan ne oreguea neẽãbʉta koibara neneẽãbʉmae. Maʉ̃ra koibara karpa de ãba yi jʉrebari ewarade. 17 Maʉ̃ra wiada ẽ bayi ne oregueaʉ̃me. Mʉ̃a mʉ̃ oprenda tʉbʉde diapanananebemata diabʉrʉ ãya’a. Maʉ̃ra neneẽãbʉ, oprenda nemitia oda k’area kĩrãk’a akʉza oprenda nekayirua oda k’area kĩrãk’a. 18 Maʉ̃ra jõma Aarón wũãwũãra yumakẽrãba koibara. Jeowa’a oprendara tʉbʉde diapananata, maʉ̃ranebemata wiña ãyide b’aibara ewari jõmaʉ̃nẽ». 25 «Jarada Aarón’a akʉza yi wũãwũãra: Naʉ̃ta yi ley oprenda nekayirua oda k’area. Oprenda nekayirua oda k’areadebemata beaibara Jeowa nãã, oprenda bama beadamae. Maʉ̃ra nek’ãrẽ neneẽãbʉ.