Hechos

26 Mamina Jeowa angelta bed’easi Felipe’a, mõbe jarasi: «Wãra bareare, o Jerusalén’neba Gazaeda wãbariare», (maʉ̃ ora drʉa ibʉawabʉ). 27 Aramaʉ̃ta iyira wãsi. Mawũẽra ũdusi yumakẽrã Etiopíadebemata, maʉ̃ba zok’abasi akʉza trajabasi Candaceita, nok’o wẽrã Etiopíadebemaita, maʉ̃ba jõma zok’abasi maʉ̃ yuwẽrã platara. Maʉ̃ yumakẽrãra wãsi Jerusalén’ena Daizeze’a yiwid’ide, 28 mamina jẽda urude iyira kochede kabayo edebaride lebasi nemi jĩgʉa propeta Isaíasba bʉdata. 29 Daizeze jaure zareaba jarasi Felipe’a: «Wãra, orrada kaʉ̃ kocheta». 30 Felipera wẽbasi mama aramaʉ̃ta iya ũrĩsi nemi jĩgʉa lenʉmʉta propeta Isaíasba bʉdata, aramaʉ̃ta widisi: «¿Bʉara bia k’awuabʉka bʉa lenʉmʉra?». 31 Iya panʉsi: «¿Mʉ̃ara sãwũã ũrĩpe neẽbʉrʉ k’aiba jaradiaita?», mawũã jarada ʉ̃rʉ jarasi Felipe’a iyiʉ̃me ãba jewedamarẽã. 32 Iya Daizeze Bedʼea akʉbadara naʉ̃ basi: «Obeja kĩrãkʼa edesida nedʉwʉrʉra beabarima, obeja iyi kara ãĩbʉepanʉena chupeabʉ kĩrãkʼa, iyira i ewa ẽ. 33 Iyi zʉbʉria opanasieda, aripe obʉta ũdubida ẽ basi. ¿Kʼaiba nebʉrai iyideba zebʉrʉara iyi sãwũã berabaridara? Iyi bebʉra neẽbayi naʉ̃ drʉadera». 34 Aramaʉ̃ta eunukoba jarasi Felipea: «Mʉ̃ bia okʼãrãpe jarada, ¿kʼai ʉ̃rʉ bedʼeabʉ naʉ̃ propetara? ¿Iyi ʉ̃rʉ mawũã ẽ bʉrʉ awuru yumakẽrã ʉ̃rʉ?». 35 Felipeta bedʼea jʉ̃drʉsi akʉza maʉ̃ne Daizeze Bedʼea ʉ̃rʉ jaradia jʉ̃drʉsi, bedʼea biata Jesu ʉ̃rʉ.