Éxodo

12 Aramaʉ̃ta Jeowaba jarasi Egipto drʉade Moisés’a akʉza Aarón’a: 2 «Idiba ʉ̃ta naʉ̃ jedekora yi nabema jedekobayi; naʉ̃ maraita yi nabema jedekobayi poaga abaʉdebemata. 3 Bed’eara jõma Israeldebema pʉwʉrʉra mõbe jarada: Naʉ̃ jedeko ewari 10dera mebẽrã abaʉba jidaibara kordero aba adewara kordero aba jidaibara de abaʉba. 4 Mamina bʉa mebẽrã mejãcha erba ẽ basibʉrʉ kordero jõma makoita ẽbẽra bʉ de k’awabʉmeba koibarabasi. Marabara dedekaibara ãyi ẽbẽra sõbebʉde akʉza ãya k’ãrẽaba kobʉde. 5 Karnero yumakẽrã zakera neneẽã baibara akʉza poaga aba b’aibara. Jidaseabʉ korderota mawũã ẽ bʉrʉ kabritota. 6 Marabara wagadaibara maʉ̃ jedekode ewari 14 bayeda, jõma Israel pʉwʉrʉrabara beaibara maʉ̃ diamasi. 7 Maʉ̃ tẽã maʉ̃ waba yiya zoara puerta bakuruta akʉza zoara puerta burusida mara deda koimae. 8 »Maʉ̃ diamasira jõma koibarabasi yi chichira. Tʉbʉde bada k’ãrãpe akʉza koibarabasi pan ne oreguea neẽãʉ̃me akʉza yi chirua soabʉme. 9 Koraidua chichi õgoabʉta akʉza chichi yumata. Baidua jõma tʉbʉde, yi buruta, yi jĩruta akʉza jõma yi jʉ̃sisida. 10 Mia k’ãrẽsida wagarãra chichira nrʉemaita. Chichita wiña bera nrʉemaita ba bʉera tʉbʉde. 11 Mara nekonʉmʉena, maraba kʉrrʉde jʉ̃badara bi’ia tajʉ̃ibara akʉza jĩrune jʉ̃badasida jʉ̃ibara adewara bakuruta juwade erbaibara. Mesera nekoibara. Jeowa Paskua baera. 12 Naʉ̃ diamasi mʉ̃ra Egiptode berabariyi mõbe mʉ̃ara beayi wũãwũã nabema ẽbẽrarãneta akʉza nedʉwʉrʉraneta jõma Egipto drʉadebʉra. Mʉ̃a k’awua oyi akʉza zʉbʉria oyi daizeze zeri ẽ Egitodebemara. Mʉ̃ra Jeowa. 13 Waba ũdubiyi mara saʉ̃ dedabʉta. Mʉ̃a wa ũdubʉrʉdera neida oẽbayi. Akʉza Egipto drʉade zʉbʉria kĩrãtana zok’abʉrʉdera marara bea ẽ bayi. 14 Marabara kĩrãbeibara naʉ̃ ewarira Jeowaita piesta obʉde. Naʉ̃ra k’ãwũã owãnaibara ewari jõmaʉ̃nẽ. Naʉ̃ra ewari jõmaʉ̃nẽ omarẽã zok’asi baera. 15 Pan ne oreguea neẽãbʉta koibara ewari 7 bayeda. Maʉ̃ k’area maʉ̃ ojʉ̃drʉbʉrʉ ewaridera mara dedaʉbara jõma ãĩ bʉeibara pan ne oregueara, yi ẽbẽra maʉ̃ ne oreguea kobʉrʉra, naʉ̃ ewarideba ewari 7 bayeda maʉ̃ra beadaibarabasi Israelde. 16 Maʉ̃ ewari ojʉ̃drʉbʉrʉ ewaridera ãba yi jʉredaibara Daizeze’a yiwid’idaita akʉza ewari 7dera ãba yi jʉredaibara abarika oita. Maʉ̃ ewaridera mia k’aita traja ẽ baibara. Awuarabʉrʉ neoseabʉ ãya koibitabʉrʉ. 17 »Marabara Piesta Pan ne Oreguea Neẽã kʼobadata oibara, maʉ̃ ewaride mʉ̃a mejãcha ẽdrʉbi baera Egipto drʉadeba. Marabara poagaza kĩrãbedaibara naʉ̃ ewarita. Naʉ̃ra ewari jõmaʉ̃nẽ omarẽã zok’asi baera. 18 Yi nabema jedekodera pan ne oreguea neẽãbʉta koibara ewari 14 kidadeba ewari 21 kiyeda. 19 Ewari 7 bayeda pan ne oreguea neẽãbʉta b’aibara mara dedara. Badu ẽbẽrata (jãpeba zedatabʉbʉrʉ akʉza maʉ̃ pʉwʉrʉdebematabʉbʉrʉ) pan ne oregueata kora maʉ̃ k’area beadaibarabasi pʉwʉrʉ Israelde. 20 Koraidua pan ne oreguea barabʉta. Mara dedara jõmaʉ̃ba koyi pan ne oreguea neẽãbʉta. 24 Marabara naʉ̃ra k’ãwũã owãnaibara. Naʉ̃ k’ãwũã zok’adara bʉa oibara akʉza bʉ wũãwũãraba. 25 Mara eda wãbʉrʉde Jeowaba mara’a drʉa diaya adade (iya jarada kĩrãk’a), naʉ̃ ewarira poagaza opanaidua. 26 Mara warraraba widira, ¿k’ãrẽa poagaza k’ãwũã opanʉ?, 27 maraba panʉña, Paskuade sakripisio opanʉra Jeowaita opanʉ. Israelitara Egiptodebasidera neida oẽ basi akʉza ẽdrʉbisi dayi mebẽrãta egipsiora zʉbʉria oside». Aramaʉ̃ta naʉ̃ pʉwʉrʉra sãkokode besida. 31 Maʉ̃ diasi, paraonbara mesera trʉ̃si Moisésta Aarón’ʉ̃me mõbe jarasi: «Wãidua mesera. Marara jĩga wãidua mʉ̃ pʉwʉrʉdebara adewara wuabema israelitarasida. Wãidua Jeowa yiwid’ide, maraba jarada kĩrãk’a. 38 Ãyibawara wãsi kʼaidu ẽbẽrarã kabanabʉta drʉa jõmadebemata. Adewara edesida obejarata akʉza pakarata, nedʉwʉrʉra mejãcha.