Juan
11 Mawũã jarada tẽã jarasi: «Dayi neũdukʼawua Lázarora kʼãĩdogoa, mamina mʉ̃ra wãñi kama urumane». 12 Aramaʉ̃ta iyi kʼaidubemaraba jarasi: «Señor, iyita kʼãĩnʉmʉbʉrʉ mawũãra jẽda arigʉyi». 13 Wãrĩnu bʼaira Jesubara jarakĩrãbasi Lázarora beisita, mamina ãyara krĩchabasi Lázarora kʼãĩnʉmasita, enaʉ̃basita. 14 Mõbe Jesuba jarasi: «Lázarora beisia». 23 Jesuba jarasi: «Bʉ mebẽãra jẽda piradrʉyi». 24 Aramaʉ̃ta Martaba panʉsi: «Mʉ̃a kʼawuabʉ jẽda piradrʉita ẽjũã kĩrãwãreãnẽ». 25 Maʉ̃ kʼarea Jesuba jarasi: «Mʉ̃ yi piradrʉbibarira akʉza bebʉ diabʉra. Yi mʉ̃ ʉ̃rʉ ĩjãbʉra iyi beisibʉsida jẽda zokʼai bayi 26 akʉza yi zokʼaipanʉra mʉ̃ ʉ̃rʉ ĩjãbʉra wuara bei ẽ bayi. ¿Ĩjãbʉka bʉa maʉ̃ra?». 38 Jesu iyi kʼãbãẽã sopʉada tẽã, wãsi Lázaro joudapeadaidu. Maʉ̃ra mõgara zobeabasi, iyi audura mõgara zromaba anabasi. 39 Jesuba jarasi: «Ãĩbʉeidua kaʉ̃ mõgarara». Mamina Marta, Lázaro mebẽãba jarasi: «Señor kaʉ̃ra mĩguiasi baibara, ewari kimarebasi baera». 40 Jesuba panʉsi: «¿Mʉ̃a jarasi ẽka bʉa ĩjãta erbʉbʉrʉ Daizezeba nekʼãrẽ nebia obʉrʉ ũduita?». 41 Beidapeada mõgaraba anakʉta ãĩ bʉesida. Aramaʉ̃ta Jesubara ʉ̃ta akʉpe jarasi: «Zeze, mʉ̃a bʉa biga diaya mʉ̃a widibʉra bʉa ũrĩbʉ baera. 42 Mʉ̃ara k’awuabʉ bʉara mʉ̃ bed’eara ewari jõmaʉ̃nẽ ũrĩbʉta, mamina mʉ̃ra k’ãwũã bed’eabʉra ẽbẽrarãza jirabʉba ĩjãnamarẽã mʉ̃ra bʉa zok’adata». 43 Maʉ̃ jarada tẽã, nemi jĩgʉa jarasi: «Lázaro, ãĩ zera». 44 Aramaʉ̃ta Lázarora ãĩ zesi iyi joudapeadadeba iyira wuaba bʉrabasi burudeba jĩrʉinʉbayeda, iyi kĩrãsida wuaba anabasi, mawũã basi baera Jesuba jarasi ãyi kʼawa panʉraʼa: «Ãĩbʉeidua iya erbʉra, mawũã enaʉ̃marẽã».