Génesis

3 Ewari berabari wãne Caínbara iyi ne uta oprenda kĩrãkʼa diasi Jeowaʼa. 4 Mamina Abelbara diasi iyi obejara nããra todata akʉza dragasida. Aramaʉ̃ta Jeowabara ũdubisi kãgata iyira akʉza iyi oprendata, 5 mamina ũdubi ẽ basi Caín kãgata akʉza iyi oprendasida. Maʉ̃ba Caínʼra mejãcha kĩrʉsi akʉza sopʉasi. 6 Mawũẽra Jeowaba Caínʼa jarasi: «¿Kʼãrẽa mejãcha kĩrʉbʉ bʉra? 7 Idubʉra bʉa obʉta akʉza jẽda nebia ora, ¿mʉ̃ara bʉra bia akʉi ẽka? Mamina bʉa idubʉ ẽ bʉrʉ akʉza nebia oẽ bʉrʉ nemiatia yi edebiseabʉ. ¿Bʉra maʉ̃a yi edebika?». 17 Caín’ra yi kimaʉ̃me ãba k’ãĩsi maʉ̃neba iyira biogosi, mawũã Enocta tosida. Maʉ̃ tẽã Caínbara parãsi pʉwʉrʉta maʉ̃ pʉwʉrʉra trʉ̃gasi yi wuarra trʉ̃ kĩrãk’a Enoc. 18 Maʉ̃ tẽã Enoc’ra Irad zezebasi, Irad’ra Mehujael zezebasi; Mehujael’ra Metusael zezebasi, Metusael’ra Lamec zezebasi. 19 Lamec’ra juwa jidasi yuwẽrã ũmebawara. Nããrabemara Adábasi tẽãbemara Zilábasi. 20 Adábara tosi Jabalta. Iyibasi nããra karpadebadara akʉza paka akʉbadara. 21 Iyi mebẽãra Jubalbasi. Iyibasi nããra arpazabadara akʉza plautazabadara. 22 Maʉ̃ awuara Zilábara tosi Tubal-Caínta, iyara nek’ãrẽ kĩrãtana obasi jiorro omarata akʉza kobre omarata. Tubal-Caín mebẽã wẽrã trʉ̃ra Naamábasi. 23 Mõbemata Lamecbara naʉ̃ trãbi bi’ia kiruta trãsi yi kimara Adá’a akʉza Zilá’a: «Ũrĩdua mʉ̃ nemita Lamec’ra kimara. Ũrĩdua mʉ̃ bed’eata: «Mʉ̃ara beabʉrʉ yumakẽrã aba mʉ̃ podata, mawũã ẽbẽra kʉ̃dra aba mʉ̃ podata. 24 Caín beada kĩrãk’a sietebayeda beadaibarabasi, maʉ̃ k’area Lamec beadara 77 bayeda beadaibarabasi». 25 Adán’ra akʉza jẽda ãba k’ãĩsida yi kimaʉ̃me, mawũã akʉza tosi wũãwũã aba. Iyara trʉ̃gasi Set, jarasi baera: «Daizezeba mʉ̃a diabʉrʉa awuru wũãwũãta Abel bari, Caínba beasi baera». 26 Set’sida wũãwũã aba barasi, trʉ̃gasi Enós. Maʉ̃ ewaride ẽbẽrarãbara zok’a jʉ̃drʉsida Jeowa trʉ̃ta.