Génesis

40 Ewari berabarida tẽã, nejue edebari nok’oba pan obari nok’oʉ̃meba nemitiata osida Egipto nok’o nãã. 2 Paraonra kĩrʉsi naʉ̃ra nezok’ara ũme ʉ̃rʉ, maʉ̃ra nejue edebari nok’obasi akʉza pan obari nok’obasi. 3 Mawũẽra jenene nok’oba iyi deda karsel erbʉde eda bʉesi ãyira, José badamae. 4 Nok’o karseldebemabara zok’asi Joséta ãyibawara bamarẽã akʉza akʉmarẽã, mawũã karselde poaga biobayedabasi. 5 Aramaʉ̃ta, nejue edebarita akʉza panadero nok’o Egiptodeta karseldebaside, ãyi aba abaka iyabaʉ diamaside k’ãĩmok’ãrãsida. Maʉ̃ k’ãĩmok’ãrãdara bed’eata jarakĩrãbasi. 6 Maʉ̃ nrʉema, José ãyi badaidu jʉ̃ẽsidera ãyira krĩcha zroma opanasi. 7 Aramaʉ̃ta, widisi paraon nezok’ara, iyira maʉ̃rabawara karseldebasi iyi jenene nok’o deda: «¿K’ãrẽa idira marara krĩcha zroma opanʉ?». 8 Ãya panʉsida: «Dai aba abaka k’ãĩmok’ãrãsida, mamina neẽbasi k’aiba daia jara ũrĩbita». Aramaʉ̃ta Joséba jarasi: «¿Daizezebʉrʉ jaraseabʉ ẽka k’ãrẽta jarakĩrãbʉra? Nebʉraidua maraba k’ãĩmok’ãrãdata». 9 Nejue edebari nok’oba jara ũrĩbisi iya k’ãĩmok’ãrãdata José’a. Jarasi: «Mʉ̃ k’ãĩmok’ãrãdera mʉ̃ nãã basi ne u ubata 10 bakuru juwa ũbeabʉta. Ne u ubara pono k’ãrãpe zaʉsi uba kuarata. 11 Maʉ̃ erbasi juwade paraon kopata. Aramaʉ̃ta mʉ̃a maʉ̃ uba jida k’ãrãpe jusi paraon kopade. Mʉã tẽã mʉ̃a diasi kopara paraon’a». 12 Aramaʉ̃ta Joséba jarasi: «Bʉ k’ãĩmok’ãrãbara naʉ̃ta jarakĩrãbʉ. Bakuru juwa ũbeabʉra jarabʉ ewari ũbeata. 13 Ewari ũbea babʉrʉde, paraonbara bʉra ẽdrʉbiyi namaʉ̃bara mawũã bʉ badamae bʉita. Bʉa nãã obada kĩrãk’a paraon’a kopa diayi, iyi nejue diabada kĩrãk’a. 14 Mamina, bʉara mʉ̃ra kĩrãbeibara bʉ bia wãnera. Mʉ̃ bia ok’ãrãpe k’ẽrẽpa kãgabʉta ũdubira akʉza bed’eara paraon’a mʉ̃ ʉ̃rʉ namaʉ̃ba ãĩ bʉemarẽã. 15 Mʉ̃ra ebreo drʉade jidasida akʉza namara mʉ̃ra k’ãrẽ mitia oẽbasi karselde eda bʉedamarẽãra». 16 Panadero nok’oba ũduside Joséba bi’ia jara ũrĩbibʉta, iya jarasi: «Mʉ̃ k’ãĩmok’ãrãde mʉ̃a ũdusi, mʉ̃a peta ũbea erbʉta mʉ̃ buru ʉ̃rʉbʉta maʉ̃ne eda pan torroatabasi. 17 Peta ʉ̃trearebʉdera nek’ãrẽ widimata kĩrãtanabasi paraon’ita, mamina maʉ̃ peta edabʉta ibanaba kobasi». 18 Aramaʉ̃ta Joséba jara ũrĩbisi: «Bʉ k’ãĩmok’ãrãdabara naʉ̃ta jarakĩrãbʉ. Peta ũbeabara jarabʉ ewari ũbea. 19 Ewari ũbeade, bʉ ochidaura paraonbara tʉyi mõbe bakurude jirabʉyi, mama ibanaba koyi bʉ yarara». 20 Mawũã berabarida tẽã, ewari ũbeade paraon toda ewarita zesi. Maʉ̃ k’area paraonbara yiko mejãcha osi iyi nezok’ara jõmaraita aramaʉ̃ta iya jarasi wemarẽã nejue edebari nok’ota akʉza panadero nok’ota mawũã iyi nezok’ara nãã panamarẽã. 21 Aramaʉ̃ta nejue edebari nok’ora iyi nãã k’ãrẽ obadama jẽda bʉesi, mawũã paraon’a nejue edebesi. 22 Mamina panadero nok’ora bea zok’asi, Joséba jarada kĩrãk’a ãyi k’ãĩmok’ãrãde. 23 Mamina nejue edebari nok’obara kĩrãduasi Joséra mawũã wua kĩrãbe ẽ basi.