Éxodo

3 Jeowabara osi egipsioraba bia akʉmarẽã iyi pʉwʉrʉta. Adewara Moisésra jõmaʉ̃ba wawiadebasi Egipto drʉadera, paraon nezok’araba akʉza pʉwʉrʉba. 4 Moisésba jarasi paraon’a: «Naʉ̃ta jarasi Jeowaba: Mʉ̃ra Egiptode berabariyi diamasi ewari ẽzadra. 5 Wũãwũãra nabema Egipto drʉadebʉra jõma beiyi, paraon wũãwũã nabemaneba nezok’a wẽrã yuba trajabʉ wũãwũã nabemainʉ. Adewara jõma beiyi nedʉwʉrʉra wũãwũã nabemasida. 6 Egipto drʉa jõmaʉ̃ne ũrĩnañi so pʉaba mejãcha bʉgadrʉnʉmʉta, maʉ̃ ewari naenara so pʉara maʉ̃ kĩrãk’a ũrĩkabasi akʉza maʉ̃ kĩrãk’ara wuara ũrĩna ẽ bayi. 7 Mia usasida berʉ ẽ bayi israelitarãra mia ãyi pakara’a. Mawũã k’awuayi maraba Jeowaba akʉbʉta saʉ̃ta egipsiorata akʉza saʉ̃ta israelitarata. 8 Aramaʉ̃ta bʉ nezok’arãra zeyi mʉ̃inʉ mõbe mʉ̃ nãã sãkokode bayi mõbe jaradayi: Wãidua bʉta, bʉ pʉwʉrʉrabawara. Maʉ̃ tẽã mʉ̃ra wãñi». Maʉ̃ jõma jara berabarida tẽã paraonmaeba kĩrʉ wãsi Moisés’ra.