Josué
5 Mawũẽ nokʼora juesomapanʉra amorreodebemarata ( Jerusalénʼnebemata, Hebrónʼnebemata, Jarmutdebemata, Lakísdebemata akʉza Eglónʼnebemata) ãba yi jʉresida ãyi gorogororabawara. Ãba wãsida, maʉ̃ tẽã pikiasida Gabaónʼnebemarabawara yõnaita. 10 Jeowaba amorreora krĩchara kʼawua ẽã totobisi, maʉ̃ba israelitarabara mejãcha makenasi ãyira Gabaónʼne; Bet-Horón o wãri zeidu pẽwãsida ãyara akʉza makenasida Azecáidu akʉza Maquedáidubayeda. 11 Ãyi Israel kʼarea wẽbasidade eda Bet-Horónʼneba, Jeowabara bajãneba ãyira batasi kue ta zromaba Azecáidubayeda akʉza beisi ãyira. Mõbe audre beisi ãyira kue taba israelitaraba beadaraira espadaba. 12 Mawũẽ (maʉ̃ ewaride Jeowaba makenasi amorreorãra israeliraba akʉbarabʉde) Josué Jeowaʉ̃me bedʼeaside, iya jarasi Israel nãã: «Bisia, piki ara Gabaón ʉ̃rʉ akʉza jedeko, piki ara Ayalón koribide». 13 Bisiara jedekoʉ̃mera pikinʉmesi ãyi nejʉrara makenañena. ¿Bʉchu ẽka Jasar librode? Bisiara pikinʉmesi bajã ẽzadra, mõbe kiu ẽ basi mia audre mia wika bida ewari ababayeda. 14 Mawũãka (mia naweda mia tẽãbida) maʉ̃ ewaride berabarida kĩrãkʼa, Jeowaba ũrĩside yumakẽrã nemita, Jeowata yõnʉmasi baera Israel bari.