Levítico

27 Pʉwʉrʉdebema abaʉba kriña nekayiruata oẽbʉrʉ, Jeowaba kãga ẽ bʉta osi baera, 28 mawũã ẽ bʉrʉ iya k’awuara nekayirua odata, edeibarabasi kabra zake neneẽãbʉta oprenda nekayirua oda k’areabʉta. 29 Iyi juwara bʉeibara oprenda nekayirua oda k’areadebema buru ʉ̃rʉ, maʉ̃ra beadaibara oprenda bama beadamae. 30 Saserdotebara iyi juwa jiwiniba wa oprenda nekayiruadebemaba zoaibarabasi altardebema kachubʉraza oprenda badamae, maʉ̃ wadebemata zarrabibarabasi altar jĩrʉ k’awa. 31 Sakripisio neneẽã erbaita draga ãĩ bʉebʉ kĩrãk’a mawũã abarika ãĩ bʉeibara dragasida. Saserdotebara maʉ̃ra chiwãbibara altarde, mama babari oprendata chiwã tũãbita, Jeowaba ʉ̃kĩrãne. Saserdotebara oyi iya nemitia odata kĩrãduamarẽã. 32 »Mamina, iya maʉ̃ oprenda nekayirua oda k’area obeja wũãwũã zaketa diara, maʉ̃ra yuwẽrã zake neneẽã b’aibara. 33 Iyi juwara bʉeibara oprenda nekayirua oda k’areadebema buru ʉ̃rʉ, maʉ̃ra beadaibara oprenda bama beadamae. 34 Saserdotebara iyi juwa jiwiniba wa oprenda nekayiruadebemaba zoaibarabasi altardebema kachubʉraza oprenda badamae, maʉ̃ wadebemata zarrabibarabasi altar jĩrʉ k’awa. 35 Karnero zake sakripisio neneẽã erbaita draga ãĩ bʉebʉ kĩrãk’a mawũã abarika ãĩ bʉeibara dragasida. Maʉ̃ saserdotebara maʉ̃ra chiwãbibara altarde, wuabemara oprenda bama ʉ̃rʉ. Saserdotebara oyi iya nemitia odata kĩrãduamarea, mawũã iya nemitia odata kĩrãduayi.