Génesis
15 Naʉ̃ jõma berabarida tẽã, Jeowara Abrán’a yi ũdubisi mama jarasi naʉ̃ bed’eata: «Abrán, perarãra. Mʉ̃ra bʉ joudrʉbari. Bʉra nebiata mejãcha erbayi». 2 Mamina Abránbara panʉsi: «Jeowa, ¿bʉa mʉ̃ara k’ãrẽta diai mʉ̃ta wũãwũãta neẽbʉrʉ? Mʉ̃a nek’ãrẽ deda jõma erbʉra Eliezerdebayi, iyira Damascodebema». 3 Adewara jarasi: «Bʉa mʉ̃ara dia ẽ mʉ̃neba zeira akʉza mʉ̃ nek’ãrẽ mʉ̃ deda jõma erbaira mʉ̃ nezok’ade». 4 Mamina Jeowaba panʉsi: «Mawũã ẽ, bʉ deda nek’ãrẽ erbʉra naʉ̃ yumakẽrã dia ẽ bayi, awuarabʉrʉ jõma bʉ wũãwũãnebayi». 5 Maʉ̃ tẽã iya ãĩ edesi mõbe jarasi: «Mʉ̃ bia ok’ãrãpe ʉ̃ta akʉra bajãta akʉza jʉachara bʉa jʉachaseabʉbʉrʉ chĩdauta». Mõbe jarasi: «K’ãwũãbayi jõma bʉdeba zebʉrʉra». 6 Abránbara wãrĩnu ĩjãsi Jeowara, aramaʉ̃ta iyara jõma aripe obʉta akʉsi. 7 Jarasi: «Mʉ̃ra Jeowa, mʉ̃a bʉra ẽdrʉbisi pʉwʉrʉ Ur de los caldeosdeba, naʉ̃ drʉa bʉa diaita». 8 Aramaʉ̃ta Abránba widisi: «Jeowa, ¿mʉ̃a sãwũã k’awuabʉ naʉ̃ drʉa wãrĩnu mʉ̃reara b’aita?». 9 Daizezeba jarasi: «Mʉ̃ita jʉrʉda paka zake poaga ũbeabʉta, cabrata poaga ũbeabʉta, carnero poaga ũbeabʉta, pusirata adewara paloma wũãwũãta jʉrʉda». 10 Nedʉwʉrʉra jõma jʉrʉ k’ãrãpe ẽzadra drapetasi, mamina ibanara mawũã oẽbasi. Maʉ̃are maʉ̃ ẽzadra drabera kĩrã tĩkʉsi. 11 Maʉ̃ k’area ãkosora ʉ̃tʉba zebʉsawasi aramaʉ̃ta Abránbara jʉrekʉa abʉsawasi. 12 Ũmadaʉ baebʉsawade, Abrán’ra mejãcha dapeatotosi akʉza iyi kʉmaera jõma paisosoatosi. 13 Aramaʉ̃ta Daizezeba jarasi Abrán’a: «Bʉara k’awuaibara bʉdeba zebʉrʉrãra yãrã drʉade b’aita akʉza maʉ̃ drʉadebemabara ãyi nezok’a babita adewara zʉbʉria odaita poaga 400 bayeda. 14 Mamina mʉ̃a k’awua oyi yi ẽbẽrarã maʉ̃ra nezok’a babidarãra mawũã berabarida tẽã ãyi mamaʉ̃ba wãbʉrʉdera nek’ãrẽ biabara ẽdrʉyi. 15 Bʉra k’ãrẽ krĩcha ẽã adu’a beiya akʉza mawũã joudaya. 16 Bʉ kau warrara akʉza nama jẽda zeyi, amorreo kayiruara wabida jõ ẽ baera». 17 Ũmadaʉ baeda tẽã mejãcha paisosoatotosi, Abránbara ũdusi hornone nãrĩ kou kou barita akʉza tʉbʉba nedʉwʉrʉra audu pʉreabi wãsi. 18 Maʉ̃ ewaridera Jeowara Abrán’ʉ̃me bed’ea abarika zesida, naʉ̃ta jarasi: «Naʉ̃ drʉara jõma bʉdeba zebʉa diaya asi, Egipto dodeba Éufrates do zromaena: 19 kenitara drʉata, kenizitara drʉata, kadmonitara drʉata, 20 ititara drʉata, perizitara drʉata repaim’ra drʉata 21 amorreora drʉata kananeora drʉata guirgaseoara drʉata akʉza jebuseora drʉata».