Éxodo

9 Naʉ̃ tabernakulora oibara akʉza mʉ̃a sãwũã omarẽã zok’adade oibara. 20 Kerubin’rabara ãyi i ũme ʉ̃ta ewa k’ãrãpe, tapata ana panaibarabasi. Ãyira yiya kĩrãbita panaibarabasi akʉza ãyi kĩrãbara tapata akʉ panaibarabasi. 21 Bʉa tapata bʉeyi Arca ʉ̃rʉ akʉza maʉ̃ Arcadera mʉ̃a tabla Testimoniota diayi maʉ̃ta eda bʉemarẽã. 22 Mʉ̃ra bʉ nãã yi ũdubiyi mʉ̃ra tapa ʉ̃rʉneba bʉme bed’eayi. Kama kerubine ũme bʉdeba arka Testimonio ʉ̃rʉ mamaʉ̃ba mʉ̃a jarayi mʉ̃a bed’ea zok’aita maʉ̃ta israelitara jaramarẽã. 23 Akʉza oibara mesata bakuru akasiaba yi drazoara b’aibara 89 sentimetro akʉza yi joʉbʉata b’aibara 44.5 sentimetro, adewara yi ʉ̃tʉata b’aibara 67 sentimetro. 24 Oro araba chiratʉibarabasi akʉza maʉ̃ i audura oroba purra b’aibarabasi. 25 Maʉ̃ tẽã audu purra kʉbʉra yi joʉbʉata 7.4 sentimetro, maʉ̃ purra kʉbʉ ʉ̃rʉ eda purra kʉbʉra oroba. 26 Akʉza ora oroba aniyo kimare maʉ̃ta mesa jĩrʉ kʉbʉza karakʉara. 27 Maʉ̃ aniyora bʉa purra kʉbʉda k’awa bʉibara maʉ̃ra yibia b’ai baera bakuru eda bʉe k’ãrãpe mesa edeita. 28 Oibara bakuru drazoa maʉ̃ bakurura akasiaba, oibara akʉza oroba chiratʉibara maʉ̃ba mesa edeita. 29  »Adewara oibara epedekota, kopata, kʉgʉrʉta akʉza taza zromata maʉ̃ne yi bade diaita oprendata maʉ̃ra jõma oro b’aibara. 30 Mesa ʉ̃rʉ kʉbʉyi mʉ̃ nãã pan Daizezeita erbʉta, maʉ̃ra ewari jõmabayi. 31  »Bʉara oibara ĩbira juwa jiwini barabʉta maʉ̃ra oroba oibara. Adewara martiyoba oibara kĩrã jʉ̃zaba zebita adewara oibara yi wagaʉta maʉ̃ daucha yi abaisida oibara akʉza juwa jiwinirasida oibara, yi kopasida adewara borokokedesida oibara akʉza neponosida. 32 Ĩbira juwa jiwinira 6 b’aibara yi wagaʉdebara juwa arare ũbea b’aibara akʉza juwa’ãkare ũbea b’aibara. 33 Juwaza kopa ũbea erbaibara almendro nepono kĩrãk’a akʉza naʉ̃ra b’aibarabasi borokoabʉta, maʉ̃are neponota mawũã arare arare bʉeibarabasi ababema juwarare iyaba kopa ũbea b’aibara almendro nepono kĩrãk’a akʉza nããra b’aibarabasi borokoabʉta maʉ̃are neponota mawũã arare arare bʉeibarabasi mawũã b’aibara juwa jiwinira 6 panʉra ĩbira wagaʉdebabʉra. 34 Ĩbira juwa jiwinibarabʉra kopa kimare erbaibarabasi almendro nepono kĩrãk’a akʉza b’aibarabasi borokoabʉta maʉ̃are neponota mawũã arare arare b’aibarabasi. 35 Juwa jiwini nabemata yi wagaʉdebemane maʉ̃ edrebayi borokoabʉta, yi ũmenebemata maʉ̃ edrebidabayi, yi ũbeadebemanebidabayi, mawũã juwa jiwinirãra 6 bayi yi wagaʉdeba zedata. 36 Borokoabʉta ĩbira juwata akʉza ĩbira juwa jiwini biobʉta jʉ̃zaba b’aibara oro omata maʉ̃ra martiyoba oibara. 37 Oibara 7 ĩbira akʉza maʉ̃raba pureabibʉrʉdera maʉ̃bara ʉ̃nañi iyi kĩrãbitabʉta. 38 Akʉza ĩbira kĩrã tibarita, adewara yi epedekota jõma oro b’aibara. 39 Zok’aibara oro 34.2 kilo ĩbira juwa jiwinibarabʉ jõma oita akʉza maʉ̃ba jõma abʉ oita. 40 Jõma aripe ora mʉ̃a katumane ũdubida kĩrãk’a.