Hebreos

11 Ĩjãibara jarakĩrãbʉ, dayirãba ĩjãita wãrĩnu berabarita daya jʉ̃ãbʉta, krĩchaita wãrĩnubʉta dayirãba ũduda ẽ mina. 4 Abelba ĩjãbʉ baera, Daizezeʼa yi audre yibiata diasi Caínʼra. Mawũã obʉba ũdubisi wuabemara iyara aripe obʉta, adewara Daizezeba bia akʉsi maʉ̃ oprendara. Iyi beisimina, iya ĩjãbʉdeba bedʼeabʉ. 5 Enocba Daizezeta ĩjãbasi baera, Daizezeba nebabisi, beita ũdu ẽ marẽã. Akʉza mia abaʉba ũdu ẽ basi Daizezeba nebabisi baera, Enoc nebai naweda iya kʼawuasi Daizezeba bia akʉsita. 6 Adewara, Daizezeta ĩjãna ẽ bʉrʉ iya bia akʉ ẽ bayi, Daizeze orrabʉbara ĩjãibara iyira wãrĩnubʉta akʉza iyi jʉrʉbʉara nebiata diabʉ. 7 Daizezeba jaraside berabarita miõba ũdukata, Noéba wãrĩnu ĩjãbasi baera, ũdubisi Daizeze wawiabʉta akʉza ojʉ̃drʉsi jãba zromata yi mebẽrã ẽdrʉbita. Mawũã ĩjãta erbasi baera ũdubisi wuabemarãra beibarabasita akʉza iya ĩjã ũdubidadeba nebiata erbaibasi. 8 Abrahánba, wãrĩnu ĩjãbʉ baera iyi trʉ̃sidadera ũrĩ k’arape mama wãsi, drʉa iya diaya adapeadama, k’awua ẽ basimina sama wãta. 9 Iyira awuru drʉadebasi mejãcha ĩjãbasi baera, drʉa jãpeba zeda kĩrãkʼa. Karpa de edre Isaac akʉza Jacobʼʉ̃me, ãyabida Daizezebara drʉta diaya asi. 10 Iyara jʉ̃ãbasi Daizeze pʉwʉrʉta, naʉ̃ra zareabasi Daizezeba parãsi baera. 11 Daizezeta wãrĩnu ĩjãbʉ baera, Sarabara zareata jidasi toita, wũãwũã barai ewari berabarisimina, iya k’awuabasi baera maʉ̃ bed’ea jaradabara aripe oita. 12 Maʉ̃ kʼarea Abrahán zõnabasimina wũãwũã mejãcha tosi, maʉ̃ra mejãchabasi chĩdaura kĩrãkʼa akʉza jʉachabe ẽ basi pusa ibʉ dokidabʉ kĩrãkʼa. 15 Mawũãsidu krĩchabasibʉrʉ ãyi nãã bada drʉata, mawũãra jʉrʉkasida jẽda wãita. 16 Mamina atiara zarea opanʉ bajãne bʉ kĩrãkʼa, drʉa biade bʼaita. Maʉ̃ kʼarea Daizezera pera ẽ ãyi kʼareara akʉza ãya jaramarẽã, iyira ãyi Zezeta. 24 Ĩjãbʉ kʼarea, Moisés zõnabachubidade kãga ẽ basi jaradamarẽã paraon kau wauta. 25 Jidasi Daizeze pʉwʉrʉbawara zʉbʉriaita, nebia kayiruadeba zebʉ erbaita krĩchaira, 26 Krĩchabasi Kristo kʼarea zʉbʉriaira audre yibiabasita nekʼãrẽ bia jõma Egiptode bʉira, akʉbasi baera nekʼãrẽ bia iyaʼa diadaita. 27 Wãrĩnu ĩjãbʉ k’area, amaesi Egiptora, nok’o mejãcha kĩrʉbʉ krĩcha ẽã, ariya piki teiteabasi jari yãrãba ũduka akʉbʉ kĩrãk’abasi baera. 31 Ĩjãbʉ baera, Rahabʼra bei ẽ basi wuabema ẽbẽra ũrĩ ẽ bada kĩrãkʼara, iya bia edasi baera ẽbẽra mia orda zedara. 32 ¿Mʉ̃ara kʼãrẽta jaraseabʉ? Mʉ̃ra ewari mejãcha nesidabʉ bedʼeaita, Gedeón, Barac, Sansón, Jefté, David, Samuel akʉza wuabemara propetara ʉ̃rʉ. 33 Ĩjãbʉdeba ganasida nokʼorata, aripe osida, Daizezeba diaya adata ũdusida, leonʼra yi kobida ẽ basi, 34 tʉbʉ mejãcha pureabʉta kiasida, ẽdrʉsida espadaba beaideba, zarea neẽãbadata zarea erpanesi, yõnera mejãcha zarea barapanasi maʉ̃ba jʉretasida gorogororara.