Génesis

34 Dinabara (Lea kau Jacob’ʉ̃meba todata) akʉ wãbasi kau wẽrãra mamabema pʉwʉrʉdebemata. 2 Ewari aba Siquemba ũdusi iyira, naʉ̃ra Hamor hebeo wũãwũãbasi, maʉ̃ra mamabema nok’obasi. Aramaʉ̃ta jida k’ãrãpe wawa osi. 3 Iya mejãcha kãgasi baera Dina, Jacob kauta, mawũã kãgabʉ baera nek’ãrẽ jõma osi iyi kãgamarẽã. 4 Siquemba jarasi yi zeze Hamor’a: «Widida naʉ̃ wẽrã zaketa mʉ̃ kima bamarẽã». 5 Jacob’ba k’awuaside Siquemba yi kau Dinata wawa osita, yi warrarãra mea paka akʉpanasi. Maʉ̃ k’area Jacob’bara k’ãrẽ jara ẽ basi ãyi zeyeda. 6 Maʉ̃ tẽã, Hamor Siquem zezera wãsi Jacob’ʉ̃me bed’eaita. 7 Jacob warraraba ũrĩside aramaʉ̃ta meaʉ̃ba zesida. Ãyira mejãcha kĩrʉbasi Siquemba imitia bed’eabisi baera Israel ʉ̃rʉ Jacob kaume ãba k’ãĩsi baera, maʉ̃ra oẽ baibarabasi. 8 Hamor’ra bed’esi ãyibawara, jarasi: «Mʉ̃ warra Siquembara mejãcha kãgabʉ bʉ kauta. Mʉ̃ bia ok’ãrape diara iyi kima bamarẽã. 9 Bed’ea abarika zedadrʉ dayirã mebẽrãi juwa jidabita. Dai’a diaidua mara kauta, daiba mara’a diaya dai kauta. 10 Marara daibawara baseapanʉ akʉza dai drʉara maranebayi. Nek’ãrẽ nedoidua akʉza nama panaidua». 11 Aramaʉ̃ta Siquemra bed’easi wẽrã zezeʉ̃me akʉza yi mebẽrãbawara: «Maraba mʉ̃ bia akʉmarẽã, maraba widibʉrʉta mʉ̃a diaya. 12 Marabara mʉ̃ platata mejãcha widiseabʉ wẽrã zake k’area nebia zromata. Maraba nek’ãrẽ badu widibʉdata mʉ̃a diayi. Mamina mʉ̃ bia ok’ãrãpe, diaidua wẽrã zakera mʉ̃ kima b’aita». 13 Mamina Jacob warrarabara sewaita krĩchasida Siquemta akʉza yi zeze Hamorta, yi mebẽã Dinata wawa osi baera. 14 Maʉ̃ k’area ãya jarasida: «Daibara mawũã obe ẽ. Diabeda ẽ dai mebẽãra yumakẽrã k’ãwũã sirkunsida ẽ chuara, maʉ̃ra biga ẽ bai baera daitara. 15 Bed’ea abarika zeseabʉ maraba naʉ̃ta odara: marara dai kĩrãk’a panaibara akʉza sirkunsidaibara jõma yumakẽrãrãra. 16 Maʉ̃ tẽã daibara diayi dai kauta akʉza daiba mara kauta erpanañi. Daira marabawara panañi mawũã pʉwʉrʉ abapaipanañi. 17 Mamina maraba ũrĩna ẽ bʉrʉ akʉza sirkunsida ẽ bʉrʉ, dai kau jidada k’ãrãpe wãñi namaʉ̃ba». 18 Hamor akʉza yi warra Siquem’itara ãya wididara yibiabasi. 19 Aramaʉ̃ta yumakẽrãbara mesera osi ãya widipanʉta, wãrĩnu kãgabasi baera Jacob kauta. Adewara iyitrʉ audre wawiapanasi yi zeze dera. 25 Ewari ũbea berabarida tẽã, mamabema yumakẽrãra puabʉeda, Simeónta Levíʉ̃me (Naʉ̃ra Jacob warrarabasia akʉza Dina mebẽãbasi) kuchota ãyiza jira edada k’ãrãpe wãsida maʉ̃ pʉwʉrʉ eda. Maʉ̃ra mia k’aiba jʉ̃ãba ẽ basi, yumakẽrãra jõma makenasida. 30 K’awuaside, Jacob’ba jarasi Simeón’a akʉza Leví’a: «Marabara mʉ̃ita bed’ea zroma webʉrʉa. Mara k’area naʉ̃ drʉadebemabara mʉ̃ra jʉradayi: kananeoraba akʉza perizitaraba. Dayirãra mejãcha ẽ. Ãyira ãba zedayi mʉ̃me yõita, mʉ̃ta beadayi akʉza jõma mʉ̃ dedabʉta».