Lucas

5 Ewari aba jesúsꞌra lago Genesaretꞌde basi mejãcha panasi ẽbẽrarãta iyi kaita iyidu jũẽsida Daizeze Bedʼea ʉ̃rĩta. 2 Maʉ̃ne Jesúsʼbara ũdusi jãba ʉ̃me ʉ̃panʉta lago oriya. Yi beda beapanʉrãra ʉ̃rabʉrʉ zekʼarãpe ãyi mayata zʉgʉpanasi. 3 Aramaʉ̃ta iyira jãbade bari kʼarãpe jarasi Simónʼa jãba yibariʼa dokiza edemãrẽa, mõbe iyira jeweda kʼarãpe jaradiasi jãbadeba ẽbẽrarã. 4 Jaradiada tẽã iya jarasi Simónʼa: «Donabʉidu wãna beda beadamarẽã mayaba». 5 Mamina Simónba jarasi: «Nejaradiabari daira ũnadrʉyeda beda wuasida, mawũãsidʉ beada ẽ basi, mamina bʉa jarabʉ baera oyi mʉ̃ara». 6 Ãyi mayaba balbʉebʉrʉdera, beda mejãcha jidasi baera mayara tʉdʉzʉa totosi. 7 Maʉ̃ kʼarea ãyara jarasida ãyi neʉ̃dukʼawuara awuru jãbadebʉa kʼarebade jʉ̃ẽmarẽã. Aramaʉ̃ta maʉ̃rabara kʼarebade jʉ̃ẽsi, jãbara ũmena birasida bedaba, jãbara mejãcha zʉgʉadogo baera, bira bʉzawasi baniaba. 8 Maʉ̃ ũdubʉrʉba Simón Pedrora sãkokode kobepe Jesúsʼa jarasi: «Mʉ̃ kʼaita barãra Nokʼo, mʉ̃ra nemitia omia baera». 9 Iyira akʉza iyi neʉ̃dukʼawuarabawara mejãchade sobiasida jipa bedata mejãcha beasida baera, 10 Zebedeo warrarasida abarika sobiasida Santiagota Juanʼʉ̃me, ãyira trajabasi Simónʼʉ̃me. Mõbe Jesúsba jarasi Simónʼa: «Wua perarãra. Naʉ̃neba ʉ̃ta ẽbẽrarãta jʉrʉyi bʉa». 11 Maʉ̃are ãyara jãbara doya ede kʼãrãpe, jõma idʉbʉ kʼãrãpe iyi kʼaidu wãsida.