Mateo
1 Libro Jesucristo ʉ̃rʉ nebʉrabʉta, David warra, Abrahám warra. 18 Kawũã tosida Jesucristora, Maríara yi bedʼeama basi Joséʉ̃me juwa jidaita, mamina ãyi ãba wãinaena jaure zareaba biogobesi. 19 Yi kima Joséra ẽbẽra kʼãrẽpa basi maʉ̃ba iyara zʉbʉria biamabasi Maríara wuabemara daidu. Maʉ̃ kʼarea krĩchasi chupea idubʉita. 20 Iya naʉ̃ ʉ̃rʉ pikaga krĩchada tẽã, Jeowa angelba kʼaimokarade iya jarasi: «Jose, David warra, perãrarã bʉ kima María bʉ deda edeita iyira jaure zareadeba biogosi baera. 21 Iyara yumakẽrãta toyi, bʉa trʉ̃gaibara Jesús, iyara ẽdrʉbiyi iyi pʉwʉrʉra ãyi nekayiruadeba». 22 Naʉ̃ra jõma kʼawũã berabarisi Jeowaba iyi propetara jaradata aripe berabarimarẽã: 23 «Ũrĩdua, wẽrã yi zakera biogobeyi, mõbe toyi yumakẽrãta iyira trʉ̃gadayi Emmanuel», maʉ̃ trʉ̃bara jarakĩrabʉ «Daizezera dayirãbawarabʉ». 24 Joséba iyi urumana tẽã osi Jeowa angelba iya zokʼadata, aramaʉ̃ta edesi yi kimara iyi deda. 25 Mamina iyara iyi kimara tõbari ẽ basi María toyeda. Iya trʉ̃gasi Jesús.