Lucas
7 Mõbe ewarita zesi Piesta Pan Ne Oreguea Neẽã nebemata, kordero beabarita. 8 Maʉ̃ta jara kʼãrãpe, Jesubara Pedrota Juanʉ̃me zokʼabʉesi: «Ara oita wãidua dayirãba Paskua kodaita». 9 Mõbe ãya widisida: «¿Sama omarẽã kãgabʉ bʉara?». 10 Iya jarasi: «Pʉwʉrʉ zromane eda wãbʉrʉde ũdudayi yumakẽrã zokʼode bania abʉta. Iyi kʼaidu wãidua akʉza iyi dede eda wãbʉrʉma wãidua. 11 De yibariʼa jaraidua: ‹Nejaradiabariba jarabʉ: «¿Samachu korra zakera, mʉ̃ kʼaidubemarabawaraʉba Paskua koira?»›. 12 Akʉza kaʉ̃ yumakẽrãba ũdubiyi korra zroma jõma barabʉta de ʉ̃tʉ. Mama Paskuara jõma ara oidua». 13 Mawũã wãbʉrʉdera iya jarada kĩrãkʼa ũdusida; mawũã jõma ara osida Paskua odaita. 14 Aramaʉ̃ta nekoi ʉ̃madaʉ babʉrʉdera iyira jewedasi iyi apostolerabawara ãba. 15 Mawũẽ iya mawũãsia: «Mʉ̃a marabawaraʉba kokĩrãbasi naʉ̃ Paskuara, mʉ̃ zʉbʉriai nãã...; 16 mʉ̃a maraʼa jarabʉ mʉ̃a naʉ̃ra wua kʼo ẽ bʼaita aripe berabariyeda ʉ̃tʉ Daizeze Nokʼode». 17 Maʉ̃ tẽã bino dope, biga diasi Daizezeʼa mõbe jarasi: «Doidua naʉ̃ta akʉza mayirai dedekaidua». 19 Maʉ̃ tẽã pan aba jidape maʉ̃are Daizeze’a yiwid’ipe bʉape ãyaʼa dedekasi mõbe naʉ̃ta jarasi: «Naʉ̃bara jarakĩrãbʉ mʉ̃ kakuata, marabari diaita. Naʉ̃ta k’ãwũã opanaidua mʉ̃ krĩchabʉdata». 20 Mawũã nekoda tẽã, abarika osi yi kopasida. Iya jarasi: «Naʉ̃ kopabara jarakĩrãbʉ bed’ea abarika zei yiwidita, maʉ̃ra yibiabayi mʉ̃ wa k’area, mʉ̃ra marabari wa zarrayi. 26 Mamina marara mawũã ba ẽ baibara, awuarabʉrʉ maranebema yi nããbemara yi tẽãbema kĩrãkʼa bʼaibara akʉza yi nãã edebʉra yi nezokʼa kĩrãkʼa bʼaibara. 44 Iyira mejãcha sopuasi baera audre yiwidibasi soiduba, mõbe iyi jʉara wa kĩrãkʼa zougasi egoroma.