Génesis

26 Zesi jarraba ewarita maʉ̃ drʉade, Abrahán ewaride zeda awurua. Maʉ̃ k’area Isaac’ra wãsi Guerar eda, Abimélec pilisteora nok’oma. 2 Aramaʉ̃ta Jeowata yi ũdubisi, mõbe jarasi: «Wãrãra Egipto edara. Awuarabʉrʉ bara mʉ̃a drʉa jaraimae. 3 Bara jãpeba zeda kĩrãk’a naʉ̃ drʉade, mʉ̃ra bʉmebayi akʉza nebia diayi. Naʉ̃ drʉa jõma bʉa diayi akʉza bʉdeba zeira. Mʉ̃ara aripe oyi bʉ zeze Abrahán jarada kĩrãk’a, mʉ̃a jaraside: 4 Jõma bʉdeba zebʉrʉra mejãchabayi chĩdau kĩrãk’a akʉza bʉdeba zebʉa naʉ̃ drʉata jõma diayi. Mebẽrã naʉ̃ drʉa jõmaʉ̃nẽbemaba bʉdeba nebiata ũduyi. 5 Mawũã oyi Abrahánba mʉ̃ bed’eata ũrĩsi baera akʉza mʉ̃a jarabʉrʉde obasi baera, mʉ̃a zok’abʉta, adewara mʉ̃ leyta». 6 Mawũã Isaac’ra Guerardebasi. 7 Yumakẽrãra maʉ̃ drʉadebemaba Rebeca ʉ̃rʉ widiside, iyara jarasi: «Iyira mʉ̃ mebẽã». Iyira mejãcha perabasi baera yi kima aita. Iyira bi’ia kirasi baera, krĩchabasi: «Yumakẽrãra maʉ̃ drʉadebemaba Rebeca k’area beadaita». 8 Maʉ̃ ewari berabarida tẽã, Abimélec pilisteora nok’oba, akʉnʉmasi bentananeba Isaacba sãwũã yi kima Rebecata kãga ũdubibʉta 9 Aramaʉ̃ta Abimélecbara trʉ̃si Isaac’ta mõbe jarasi: «Kaʉ̃ra bʉ kima, ¿k’ãrẽa jarasi bʉara mʉ̃ mebẽãta?». Isaacba panʉsi: «Mʉ̃ra perabasi iyi k’area beadai baera». 10 Aramaʉ̃ta Abimélecba jarasi: «¿K’ãrẽa k’ãwũã obʉrʉ bʉara daira? Badu pʉwʉrʉdebemata bʉ kimaʉ̃me ãba k’ãĩseabasi, bʉ k’area daiba kayiruata okasi». 11 Maʉ̃ k’area Abimélecbara pʉwʉrʉ jõmaʉ̃’a naʉ̃ta zok’asi. Jarasi: «Baduba naʉ̃ yumakẽrãta tõbaridara akʉza yi kimata, beiya». 12 Mawũẽra Isaac’ra mama ne u besi, maʉ̃ poagade 100 audre jʉrepesi iya nãã ne udaira, Jeowaba k’arebabasi baera. 13 Yumakẽrãra nek’ãrẽ biata mejãcha ũdusi, jõma bia wãsi akʉza mejãcha platata erbesi. 14 Obejarata, pakarata adewara nezok’arata mejãcha erbesi. Maʉ̃ k’area pilisteoarabara bia akʉda ẽ basi. 15 Maʉ̃ k’area pilisteorabara yi zeze Abrahán nezok’araba pozo odata anasida egoroba. 16 Aramaʉ̃ta Abimélecba jarasi Isaac’a: «Daideba jĩga wãra, bʉra daide ʉ̃ta nek’ãrẽ bia erbida baera». 17 Maʉ̃ba Isaac’ra wãsi mamaʉ̃ba, Guerar koribi eda wãsi bade. 18 Isaacbara akʉza jẽda ewasi pozo pilisteoraba egoroba ananata yi zeze Abrahán ewaribaside wadapeadata. Akʉza yi zezeba trʉ̃ diadata iyabaʉ trʉ̃ta diasi. 19 Ãya koribide wanʉmʉena Isaac nezokʼarabara ũdusida baniara. 20 Mamina pastorera Guerardebemara bedʼeakasida Isaac nezokʼara bawara, akʉza jarasida: «Daide naʉ̃ baniara». Maʉ̃ kʼarea Isaacbara maʉ̃ bania sobeara trʉ̃gasi Ésec, mama iyiʉ̃me bedʼeakasi baera. 21 Maʉ̃ kʼarea awuru bania sobeata wa jʉ̃drʉsida, maʉ̃ bania sobea kʼareabida abarika bedʼeakasida, maʉ̃ kʼarea maʉ̃ra trʉ̃gasi Sitná. 22 Maʉ̃ dããra ẽãne awuru bania sobeata wa wãsi, mamina maʉ̃ kʼareara bedʼeakada ẽ basi. Maʉ̃ kʼarea iyara trʉ̃gasi Rehobot akʉza jarasi: «Naʉ̃ra kʼãwũãbʉ Jeowa kʼarebadeba, iyara diabʉrʉ ewara zromata, eaba wãbibʉrʉ dai mejãcha naʉ̃ pʉwʉrʉde». 23 Maʉ̃are wãsi Beer-Sebaeda. 24 Maʉ̃ diamasi Jeowata iyiʉ̃me bedʼeasi, mõbe jarasi: «Mʉ̃ra bʉ Zeze, Abrahán Daizeze, perarãra mʉ̃ra bʉmebʉ baera, mʉ̃a bʉara mejãcha nebiata diayi akʉza eababiyi bʉdeba zebʉrʉrãra».