Génesis

38 Maʉ̃ ewaribasidera Judábara amaesi iyi mebẽãra mawũãbʉsi iyi karpa deta yumakẽrã adulamita k’awa iyi trʉ̃ra Hirábasi. 2 Mama Judábara Súa kauta ũdusi iyira kananeobasi, iyira maʉ̃’ʉ̃me juwa jidasi akʉza erk’ãĩsi. 3 Aramaʉ̃ta iyira biogo besi. Maʉ̃ tẽã wũãwũã aba tosi akʉza trʉ̃gasi Er. 4 Akʉza biogo besi mawũã wũãwũã todara trʉ̃gasi Onán. 5 Adewara tosi maʉ̃ra trʉ̃gasi Selá. Maʉ̃ wũãwũã tosidera iyirabasi Aczibde. 6 Ewari berabari wãne yi wũãwũãra mia k’ãĩbisi wẽrãʉ̃me yi trʉ̃ra Tamar. 7 Mamina Jeowabara kãga ẽ basi Erba obadara, Judá wũãwũã nabemata. Maʉ̃ba Jeowabara beasi. 8 Maʉ̃ba Judába jarasi Onán’a: «Juwa jidara bʉ mebẽã kimabadaʉ̃me mawũã zraʉ̃me juwa jidaita. Maʉ̃ta erk’ãĩra bʉ mebẽã wũãwũã to diaita». 9 Mamina Onánbara k’awuabasi maʉ̃ wũãwũãra iyide ẽ baita. Iya erk’ãĩsidera nek’ãrẽ jõma osi biogo ẽ bamarẽã, mawũã yi mebẽã wũãwũã to dia ẽ baya. 10 Mamina iya obadara Jeowa dabʉ nãã mitiata obasi. Maʉ̃ k’area naʉ̃si beasi. 11 Aramaʉ̃ta Judába jarasi Tamar’a, yi ãĩgʉ’a: «Bara bʉ zeze deda, pẽdrade bara mʉ̃ wũãwũã Selá wariyeda». Iya krĩchabasi baera: «Daya k’awua ẽ beira yi mebẽrã kĩrãk’a». Mawũã Tamar’ra wãsi yi zeze deda. 12 Maʉ̃ ewari berabarida tẽã Judá kimara beisi, Súa kauta. Judá jẽga berabarida tẽã, wãsi iyi neũduk’awua Hirá adulamitama obeja kara kõpanʉrainʉ Timnáne. 13 Aramaʉ̃ta ẽbẽra abaʉba jarasi Tamar’a: «Bʉ zawarera Timnáma wã iyi obejara kara kõkʉaita». 14 Aramaʉ̃ta iya pẽdra wua jʉ̃badara wẽĩtasi, mõbe kĩrã anasi, wua anebari jʉ̃ k’ãrãpe jewedasi Enaim wãbari ode, maʉ̃ra Timnáma wãbari odebasi. Maʉ̃ta mawũã osi Seláta warisi baera akʉza iyiʉ̃me juwa jidabida ẽ basi baera. 15 Judába ũduside krĩchasi wẽrã odebemata, Tamar’ra wuaba kĩrã anasi baera. 16 Amaraʉ̃ta iyi wã odebara aña jʉ̃drʉsi, jʉ̃ẽsi yuwẽrãinʉ, iya k’awua ẽ basi baera iyi ãĩgʉta naʉ̃ta jarasi: «Mʉ̃ bia ok’ãrãpe, mʉ̃a bʉta erk’ãĩbira». Iya panʉsi: «¿Bʉa mʉ̃a k’ãrẽta diai mʉ̃a bʉta erk’ãĩra?». 17 «Mʉ̃a dia bʉeyi kabrito aba bʉita mʉ̃ nedʉwʉrʉdebemata» mawũã jarasi iya. Iya panʉsi: «¿Bʉara mʉ̃ara k’ãrẽta dia amae maʉ̃ dia bʉeyedara?». 18 Iya widisi: «¿K’ãrẽta kãgabʉ mʉ̃a amaemarẽãra?». Aramaʉ̃ta iya jarasi: «Sortijata bʉ kordon’ʉ̃me akʉza bakuru bʉa juwade erbʉta». Aramaʉ̃ta iya diasi, mawũã Tarmarta erk’ãĩsi akʉza biogo amaesi. 19 Maʉ̃ berabarida tẽã, iyi piradrʉ k’ãrãpe wãsi, adewara wẽãsi iya wua anebari jʉ̃badara akʉza jẽda wua jʉ̃si pẽdrade.