Éxodo

6 Aramaʉ̃ta Jeowaba panʉsi Moisés’a: «Atia bʉa akʉyi mʉ̃a k’ãrẽta oita paraon’ra. Iyi juwa ʉ̃ta chuba obiyi ãĩ wãmarẽã, adewara iyi juwa ʉ̃ta chuba obiyi drʉadeba ãĩ wãmarẽã». 2 Aramaʉ̃ta Daizezeba jarasi Moisés’a: «Mʉ̃ra Jeowa. 3 Mʉ̃ra yi ũdubibasia Abrahán’a, Isaac’a, Jacob’a Daizeze Jõma oseabʉde, mamina mʉ̃ trʉ̃ Jeowa, ãya’a jaradia ẽ basi. 4 Adewara mʉ̃ra bed’ea abarika zesi ãyibawara Canaán drʉa diaita, drʉa ãyi jãpeba zeda kĩrãk’abadata. 5 Mʉ̃a ũrĩbʉrʉa mʉ̃ pʉwʉrʉ Israel zʉbʉriara, egipsioraba ãyi nezok’a babibʉrʉra, maʉ̃ k’area kĩrãbebʉ mʉ̃ bed’ea abarika zedara. 6 »Maʉ̃ba israelitara jarada: Mʉ̃ra Jeowa, mʉ̃a ẽdrʉbiyi egipsioraba nezʉgʉa ataʉbibʉdeba akʉza wuabema nezok’a babʉdeba. Mʉ̃a ẽdrʉbiyi mʉ̃ juwa iyi ʉ̃ta bʉba akʉza mejãcha zʉbʉriabiyi. 7 Mʉ̃ara jidayi mʉ̃ pʉwʉrʉ kĩrãk’a akʉza mʉ̃ra mara Daizezebayi . Marabara wãrĩnu k’awuadayi mʉ̃ra Jeowa mara Daizezeta, mara Egiptode nezʉgʉa ataʉbʉdeba ẽdrʉbita. 8 Mʉ̃a edeyi drʉa Abrahán’a, Isaac’a akʉza Jacob’a jaradama, maʉ̃ta maranearabayi. Mʉ̃ra Jeowa». 9 Maʉ̃ tẽã, Moisésbara jarasi naʉ̃ bed’eata israelitara, mamina ãyara ũrĩ ẽ basi Moisés bed’eara, ãyi mejãcha zok’apanʉba k’ãrẽ oamasi baera. 10 Aramaʉ̃ta Jeowaba Moisés’a jarasi: 11 «Wãra paraon’a jarade, Egipto nok’o’a, idu wãbimarẽã israelitarata iyi drʉadeba». 12 Aramaʉ̃ta, Moisésba jarasi Jeowa’a: «Israelitaraba mʉ̃ bed’eata ũrĩna ẽ bʉrʉ, ¿sãwũã ũrĩ paraonbara, mʉ̃ta k’ãwũã bia bed’ea be ẽ bʉrʉ?». 13 Mawũãsidu, Jeowabara jarada ʉ̃rʉ jarasi Moisés’a akʉza Aarón’a, iya bed’ea zok’adata jaramarẽã israelitara’a adewara pararon’a, Egipto nok’o’a, mawũã israelitara ẽdrʉbita drʉa Egiptodeba. 14 Naʉ̃rata nok’ora bʉ zeze dedara. Rubén wũãwũãrata, Israel wũãwũã nabemara naʉ̃rabasi, Hanok, Palú, Hezrón akʉza Carmí. Naʉ̃rata Rubén mebẽrãra. 15 Simeón wũãwũãrãra naʉ̃rabasi, Jemuel, Jamín, Ohad, Jakín, Zóhar akʉza Shaúl, kananea wũãwũã. Naʉ̃rata Simeón mebẽrãra.