Éxodo
17 Jõma Israel pʉwʉrʉra drʉa ibʉawakiru Sineba wãsida. Drʉaza wãsi Jeowaba jarabʉde. Maʉ̃ta jʉ̃ẽsida Refidim drʉaidu mama besida, mamina mamara neẽbasi baniara pʉwʉrʉraba dodamarẽã. 2 Aramaʉ̃ta pʉwʉrʉra Moisés’ʉ̃me bed’eakasida, ãya jarasida: «Dai’a diara bania doita». Mamina Moisésba panʉsi: «¿K’ãrẽa mʉ̃me bed’eakapanʉpe? ¿K’ãrẽa opanʉ Jeowaba k’areba k’awuaita?». 3 Pʉwʉrʉra mejãcha obisiaba berabarinʉmasi. Maʉ̃ k’area Moisés ʉ̃rʉ imitia bed’eapanasi, ãya jarasida: «¿K’ãrẽa daira wesida Egiptodeba? ¿Wesika dai obisiaba beamarẽã akʉza dai wũãwũãta akʉza dai pakata?». 4 Aramaʉ̃ta, Moisés’ra Jeowa’a k’areba widisi, iya jarasi:«¿Mʉ̃a sãwũã oi naʉ̃ pʉwʉrʉra? Ãya mʉ̃ra mõgaraba beayi maʉ̃ta neẽbʉrʉ». 5 Aramaʉ̃ta Jeowaba jarasi Moisés’a: «Pʉwʉrʉ nãã wãra, bʉ k’aidu edera Israeldebema zõrãrãta akʉza bakuru do Nilo deguebidata. Maʉ̃ta bʉ juwa nãã erbara. 6 Mʉ̃ra bʉ nãã bayi, mõgara Horeb ʉ̃rʉ. Bʉara deguebibara maʉ̃ mõgarama, mamaʉ̃ba baniata zeyi pʉwʉrʉraba dodamarẽã». Maʉ̃ta osi Moisésbara zõrãrã Israeldebema dabʉ nãã. 7 Maʉ̃ drʉara trʉ̃si Masá akʉza Meribá, mama Moisésta israelitarabawara bed’eakasida baera akʉza jarapanasi baera Jeowaba k’areba k’awuaita, ãya jarabasi: «¿Jeowara dayirãnebʉka mawũã ẽ bʉrʉ neẽka? 8 Maʉ̃ tẽã amalekitarãra jʉ̃ẽsida Refidim’inʉ Israelbawara yõita. 9 Maʉ̃ k’area Moisésba naʉ̃ta jarasi Josué’a: «Jʉrʉda ʉ̃kʉrʉ yumakẽrãrata mõbe yõ wãra amalekitarabawara. Nʉ mʉ̃ra katʉma kĩbʉde bayi Daizeze wãrĩnura bakuruta juwade erbayi». 10 Aramaʉ̃ta Josuébara osi Moisésba zok’ada kĩrãk’a, wãsi yõne amalekitarabawara. Maʉ̃ena Moisésta, Aarónta akʉza Hurta katuma kĩbʉ eda wãsida. 11 Moisés juwa ʉ̃ta bʉedara israelitaraba ganapanasi mamina juwa eda bʉedara amalekitaraba ganapanasi. 12 Moisés juwa auk’arasidera iyi edre mõgarata kʉbʉsida iyi jewedamarẽã. Adewara Aarónba akʉza Hur’ʉ̃meba Moisés juwata jidasida aba juwaʼãkare aba juwarare. Mawũã juwa ʉ̃tabasi ũmadaʉ baeyeda. 13 Mawũã Josuébara espadaba makenasi Amalecta akʉza iyi k’aidu pananarasida. 14 Aramaʉ̃ta Jeowaba jarasi Moisés’a: «Naʉ̃ librota bʉra kĩrãbedamarẽã akʉza jarada ʉ̃rʉ jarada Josué’a: Jõma makenañi amalekitarãra bajã edrera neẽbayi akʉza mia k’aiba kĩrãbeda ẽ bayi». 15 Maʉ̃ tẽã Moisésba osi altarta maʉ̃ra trʉ̃gasi Jehová-Nisí 16 iya jarasi: «Jah ʉ̃rʉ juwa zareasida baera, Jeowara yõbayi amalekitarabawara ãyideba zebʉrʉrabawara».