Éxodo
35 Maʉ̃ tẽã, Moisésbara ãba zebisi pʉwʉrʉra mõbe israelitara jarasi: «Naʉ̃ta jarasi Jeowaba maraba omarẽã: 2 ewari 6 erbʉ bʉ trajaita, mamina ewari 7dera ewari neneẽãbʉ maraita; maʉ̃ ewaridera sabado baera enaʉ̃ibara Jeowa bʉ Daizezeita. Ẽbẽra abaʉta sabadode trajara beibara. 3 Sabadodera mia abaʉ deda ĩbirata koabe ẽ». 4 Maʉ̃ tẽã Moisésba jarasi pʉwʉrʉ Israel’a: «Naʉ̃ta Jeowaba zok’asi odamarẽã: 5 Jõmaʉ̃ba nek’ãrẽ jʉrʉidua Jeowa’a diaita. Jõmaʉ̃ba soiduba nek’ãrẽ diakĩrãbʉbʉrʉ Jeowaita weidua: orota, platata, kobreta, 6 ilo pãwãrata, ilo batatata, ilo purruta, linoarata, kabra karata, 7 karnero e yi purruba zoabʉta, poka eta, bakuru akasiata, 8 aseiteta ĩbiraita, bata aseite neneẽãbʉ jidaita akʉza insienso tũãpo oita, 9 adewara weibara mõgara oniseta adewara wuabemara mõgarata efode bʉeita akʉza petoralde. 10 »Ẽbẽrarã jõmaʉ̃ta zeibara maranebemaba Jeowaba zok’abʉ jõma odamarẽã: 11 tabernakulo oita akʉza yi karpa de oita, adewara maʉ̃ anabari oita akʉza yi drʉ̃daʉta adewara yi abidabari parãita; 12 Arca oita akʉza yi bakuru oita, yi tapa oita, wua yi drabari oita; 13 mesata, bakururata, jõma mama nek’ãrẽbʉta akʉza pan Daizezeita erbʉta; 14 ĩbira juwa jiwinibarabʉta, maʉ̃ba nek’ãrẽ erbʉta, maʉ̃ra ĩbirata akʉza aseite maʉ̃ ʉ̃na erbaita; 15 altar insienso baita akʉza yi bakururata, aseite neneẽãbʉ jidabʉta, adewara insienso tũãpoabʉta; 16 altar oprenda nek’ãrẽ ba diaita, kobre jʉrrʉjʉrrʉabʉta yi bakururabawara akʉza jõma mama nek’ãrẽ erbʉta, ne sʉgʉbarita yi abidabari eda; 17 wua ewaradebʉta, yi drʉ̃daʉta akʉza yi abidabarita; wua ewara eda wãbarita; 18 tabernakuloita yi jʉ̃ãsubarita, adewara ewaraita yi jʉ̃ãsubarita akʉza yi jʉ̃karata; 19 wua bi’ia kasuita tabernakulode trajaita akʉza saserdote Aarónba wua jʉ̃marẽã adewara yi warrarabida wua jʉ̃ita saserdotede traja jʉ̃ita». 20 Maʉ̃ tẽã Israel pʉwʉrʉ jõma Moisésmaeba wãsida. 21 Maʉ̃ tẽã yi soiduba diadarabara edesida ãya nek’ãrẽ diaita Jeowa. Tienda ãba yi jʉrebari oita, oita jõma nesidabʉta kama trajabʉrʉde akʉza wua neneẽãbʉ kasuita. 22 Mawũã yumakẽrãraba, yuwẽrãraba soiduba edesida aniyota, areteta, ãyi jõmaʉ̃ba Jeowa’a oprenda diasida oro omata. 23 Jõma ilo pãwãrata, ilo batatata, ilo purruta, lino arata, kabra karata, karnero e yi purruba zoabʉta, poka eta jõma edesida. 24 Jõma yi platata akʉza kobreta diakĩrãbʉrabara edesida Jeowaita akʉza jõma bakuru akasia erpanʉrabara edesida maʉ̃ trajo oita. 25 Jõma wẽrãra bia obʉbara ãyi juwaba osida ilota mõbe etesida: ilo pãwãrata, ilo batatata, ilo purruta akʉza linoarata. 26 Jõma wẽrãra bia obʉrabara soiduba diakĩrãbʉ baera kabra karata ilo babisida. 30 Aramaʉ̃ta Moisésba jarasi israelitara: «Akʉidua Jeowaba jʉrʉsi Bezalelta Urí warrata, Hur warrata Judádebemata. 31 Daizeze jaure zareata diabʉrʉ buru bia bamarẽã, k’awua bamarẽã, bi’ia akʉ bamarẽã akʉza nek’ãrẽ trajo jõma bi’ia omarẽã juwaba 32 mawũã nek’ãrẽ bi’ia oseabʉ oroba, plataba akʉza kobreba, 33 mõgara kõkʉape akʉza maʉ̃ba nek’ãrẽ bia oita adewara bakuruba nek’ãrẽ jõma bia parã kõẽita. 34 Iyi sode akʉza bʉsi Oholiab sode, Ahisamac warra, Dan’nebema, sãwũã awurua bia jaradia k’awua bamarẽã. 35 Nek’ãrẽ jõma jaradiasi juwaba nek’ãrẽ jõma ok’awua bamarẽã, nek’ãrẽ jõma bi’ia obʉta, kasubʉta ilo pãwãraba, ilo batataba, ilo purruba akʉza linoaraba. Naʉ̃ra ẽbẽrarãbara trajo jõma oyi akʉza nek’ãrẽ jõma oyi.