Éxodo
37 Bezalelbara osi Arcara bakuru akasiaba. Yi drazoata basi 111 sentimetro, adewara 67 sentimetro basi yi joʉbʉata akʉza 67 sentimetro basi yi ʉ̃tʉata. 2 Iyara chiratʉsi oroaraba eda akʉza ãĩ adewara i audu oroba purratʉsi. 3 Osi aniyota kimare oroba akʉza mesa jĩrʉ kʉbʉza maʉ̃ta karakʉasi: yiya aniyo ũme karakʉasi. 4 Akʉza osi bakuruta akasiaba, maʉ̃ta oroba chiratʉsi. 5 Aramaʉ̃ta maʉ̃ bakurura aniyode eda bʉesi Arca edeita. 6 Akʉza osida tapata oroaraba. 111 sentimetro basi yi drazoata akʉza 67 sentimetro basi yi joʉbʉata. 7 Adewara osi kerubirata ũme oroba maʉ̃ra martiyoba parãnabasi akʉza yiya panasi tapa ʉ̃rʉ. 8 Kerubin’rãra kĩrãbita panasi, aba namare aba saware. Maʉ̃ra kerubin ũmera tapa ʉ̃rʉ basi yiya. 9 Kerubin’ra ãyi i ũme ʉ̃ta ewapanasi, tapa anapanasi. Ãyira yiya kĩrãbita panasi akʉza ãyi kĩrãbara tapa akʉpanasi. 10 Adewara osi mesata bakuru akasiaba. Mesara 89 sentimetro basi yi drazoata, adewara 44.5 sentimetro basi yi joʉbʉata akʉza 66 sentimetro basi yi ʉ̃tʉata. 11 Oroaraba chiratʉbasi akʉza maʉ̃ i audura oroba purrabasi. 12 Adewara audu purra kʉbʉsi yi joʉbʉata 7.4 sentimetro, maʉ̃ purra kʉbʉ ʉ̃rʉ eda purra kʉbʉsi oroba. 13 Akʉza oroba aniyo kimare osi, maʉ̃ta mesa jĩrʉ kʉbʉza karasi. 14 Maʉ̃ aniyora purra kʉbʉ k’awabʉsi, maʉ̃ra yibiabasi bakuru eda bʉe k’ãrape mesa edeita. 15 Osi bakuru drazoabʉta akasiaba, maʉ̃ra oroba chiratʉbasi maʉ̃ba mesa edeita. 16 Maʉ̃ tẽã osi nek’ãrẽ mesa ʉ̃rʉ badata: epedekorata, koparata, kʉgʉrʉrata akʉza taza zroma maʉ̃ne yi ba eda diaita oprendade, maʉ̃ra jõma orobasi. 25 Akʉza osi altarta insiensoita maʉ̃ra bakuru akasiaba osi. Yiya basi 44.5 sentimetro yi drazoata akʉza 44.5 sentimetro yi joʉbʉata akʉza 89 sentimetro yi ʉ̃tʉata. Altarta kachuʉ̃mera jõma abaʉdebasi. 29 Adewara osi aseite neneẽãbʉ jidabarita akʉza insienso tũãpoabʉta. Naʉ̃rãra bi’ia yi parãmabasi.