Levítico

1 Jeowaba Moisés trʉ̃ k’ãrãpe bed’easi karpa de ãba yi jʉrebaridʉba. Iya jarasi: 2  «Israelitarabawara bed’eara mõbe jarada: Ʉ̃kʉrʉ maranebemaba Jeowa’a diaibʉrʉ oprendade nedʉwʉrʉ urumʉ̃rʉãbʉta, pakadebema b’aibara mawũa ẽ bʉrʉ ʉ̃kʉrʉ nedʉwʉrʉdebema b’aibara. 3 »Baduba oprenda babaride pakata diakĩrãbʉbʉrʉ, maʉ̃ nedʉwʉrʉra yumakẽrã b’aibara akʉza k’ãrẽ neneẽã baibara. Jeowa nãã soiduba diaibara karpa de ãba yi jʉrebarimae. 4 Yi juwara bʉeibara maʉ̃ oprenda buru bai ʉ̃rʉ, maʉ̃ba k’arebayi iyi nemitia odara kĩrãduamarẽã. 5 »Mõbe toro zaketa beadaibara Jeowa nãã. Aarón wũãwũãraba saserdoteraba, diaibara wata akʉza maʉ̃ba jĩzoabibara altar audu, maʉ̃ra bʉ karpa de ãba yi jʉrebari eda wãbaride. 6 Maʉ̃ oprenda baira jodaibaraba akʉza wiñane drakʉaibaraba. 7 Aarón wũãwũãraba saserdoteraba, tʉbʉ ara bʉeda k’ãrãpe altarde pʉrebidaibara. 8 Aarón wũãwũãraba saserdoteraba, yi drakʉadarata yi buruʉ̃me akʉza yi dragata bʉeibara tʉbʉ ʉ̃rʉ altarde. 9 Yi jʉ̃sirata akʉza yi bʉwʉrʉrata sʉgʉibara baniaba, maʉ̃ saserdotebara maʉ̃rãra jõma chiwãbibara altarde. Maʉ̃ra oprenda bama, mama babari oprenda chiwã tũãbita, Jeowaba ʉ̃kĩrãne. 10 »Baduba oprenda nedʉwʉrʉdebemata diakĩrãbʉbʉrʉ (maʉ̃ne karnero warrarabʉta mawũã ẽ bʉrʉ kabrarata), maʉ̃ nedʉwʉrʉra yumakẽrã b’aibara akʉza neneẽã baibara. 11 Akʉza maʉ̃ra beaibara Jeowa nãã altar wãdeare. Aarón wũãwũãraba saserdoteraba, jĩzoabibara maʉ̃ wara altar audu. 12 Iyara wiñane drakʉayi, saserdoteba buruʉ̃me akʉza yi dragata bʉeibara tʉbʉ ʉ̃rʉ altarde. 13 Iya yi jʉ̃sirata akʉza yi bʉwʉrʉrata sʉgʉibara baniaba, maʉ̃ saserdotebara maʉ̃rãra jõma chiwãbibara altarde. Mama babari oprendata chiwã tũãbita, Jeowaba ʉ̃kĩrãne. 14 »Mamina baduba ibanata diara oprenda bama kĩrãk’a Jeowa’a, maʉ̃ra tortolata mawũã ẽ bʉrʉ pũsĩra wũãwũãrata b’aibara. 15 Maʉ̃ saserdotebara maʉ̃ra ibana aba abaka altarde diaibara, ochidau kõna k’ãrãpe chiwã tũãbidayi altar ʉ̃rʉ. Mamina maʉ̃ wara zarrabidaibara altar k’awa. 16 Ãĩ bʉeibara yi ochiruta, yi karata akʉza maʉ̃rãra altar juwarare bʉeibara, itarramae. 17 Maʉ̃ra kõibara yi ibʉare mamina ũme zebi ẽ baibara. Aramaʉ̃ta saserdotebara chiwã tũãbibara altar ʉ̃rʉ, tʉbʉ pʉreabʉde. Maʉ̃ra oprenda bama, mama babari oprenda chiwã tũãbita, Jeowaba ʉ̃kĩrãne.