Ester

4 Iyara nekʼãrẽ zokʼamarẽã diasida nokʼo deda. Mardoqueoba zokʼabʉra audre bia owãsi baera, ẽbẽrarã mejãchaʉba ũdukʼawuasida. 15 Mõbe judiora Susade badara jẽda yi jʉresida 14 adarde akʉza beasida 300 ẽbẽrarã Susade. Mamina jãrĩna ẽ basi ãya nebia erbadara. 16 Wuabemara judiora, nokʼoba zokʼabʉ drʉade badarasida ãba yi jʉresida ãyibari yõita. Beasida 75.000 ãyi nejʉradebemata mawũã ẽdrʉsida ãyi nejʉraraneba, mamina jãrĩna ẽ basi ãya nebia erbadara. 20 Maʉ̃ mawũã berabaridara Mardoqueobara bʉsi akʉza kartata zokʼa bʉesi judiora nokʼo Asueroba zokʼabʉ drʉade badara, yi arakʼaitapanʉra akʉza jĩgapanʉra. 21 Iya zokʼasi naʉ̃ta odamarẽã ewari 14 akʉza 15 adarde, 22 maʉ̃ra ewaride judiorãra ẽnaʉsi baera ãyi nejʉradeba. Naʉ̃ jedekode ãya pʉa erbadara sobiabasi akʉza sopʉata piestabasi. Naʉ̃ra ewaridera yiko mejãcha oibarabasi akʉza sobiabaibarabasi, adewara ãyirai yikota zokʼaibarabasi akʉza nekʼãrẽ diaibarabasi yi kʼãrẽ neẽ panʉra. 26 Maʉ̃neba ʉ̃ta maʉ̃ra ewarira Purim trʉ̃gapanasi, pur bedʼeadeba zebasi baera. Mardoqueoba karta bʉdadeba, ãya kʼãrẽ ũdudadeba akʉza ãyi kʼãrẽ berabaridadeba, 27 judiorabara ĩjãsida ãya, ãyi wũãwũãraba akʉza ãyiʉ̃me panʉraba kĩrabedaita maʉ̃ra ewarira ũmeta akʉza kartade bʉda kĩrãkʼa oibasi poagaza maʉ̃ra ewari zebʉrʉde. 28 Mebẽrã ãyideba zebʉrʉra aba abakaʉba kĩrãbeibarabasi akʉza oibarabasi maʉ̃ra ewarirãra drʉa jõmaʉ̃mae, adewara pʉwʉrʉ jõmaʉ̃mae. Judiorabara kĩrãduada ẽ baibasi Purim ewarira akʉza ãyi wũãwũãrabida kĩrãduada ẽ baibasi akʉza oibasi maʉ̃ra.