2 Tesalonicenses

3 Daibara ewari jõma biga diapanʉ Daizezeʼa mara kʼarea, mebẽrã. Mawũã jarapanʉ mara ĩjãta wari wã baera akʉza kãga yiya ũdubibʉta wari wã baera. 4 Marata pẽwãpanʉmina akʉza bedʼea zroma berabaripanʉmina maraba awuantapanʉ akʉza ĩjãta ũdubipanʉ, maʉ̃ kʼarea daira ibia bedʼeapanʉ mara ʉ̃rʉ, wuabemara Daizeze kongregasionʼrane. 6 Wãrĩnu bʼaira, yibiabayi Daizezeba kʼãwũã zʉbʉria oita yi ẽbẽrarã mara zʉbʉriabibʉta. 7 Mamina maranebema atia zʉbʉriabʉra, kʼarebadayi aduʼa bʼaita dai kĩrãkʼa, Jesuta ʉ̃tʉba iyi angelera zarea barabʉbawara zebʉrʉde 8 tʉbʉ eda, makenabʉrʉde yi Daizeze ũdukʼawua ẽ badarata akʉza yi bedʼea bia Jesu ʉ̃rʉ jarada ũrĩ ẽ badarata. 9 Naʉ̃ra ẽbẽrarã jipa jõma makenañi, mawũã ãyira neẽbayi Nokʼo mejãcha zarebarabʉ nãã.