Revelación

13 Nedʉwʉrʉ mẽsiara ariya piki edaʉnʉmesi pusa ibʉde. Maʉ̃ne ũdusi awuru nedʉwʉrʉ mẽsita pusadeba ʉ̃tʉ uruta. Maʉ̃bara erbasi kachu 10 akʉza buruta 7. Yi kachuza korona aba erbasi akʉza ãyi burude trʉ̃ Daizezeʼa wawia ũdubibʉ ẽãta erbasi. 2 Nedʉwʉrʉ mẽsi mʉ̃a ũdudara imama kĩrãkʼabasi, mamina yi jĩrʉra ui jĩrʉ kĩrãkʼabasi, adewara yi ira leon i kĩrãkʼabasi. Akʉza dragonbara diasi iyi zareata nedʉwʉrʉ mẽsiʼa, diasi iyi bʉgueta adewara iyaʼa zokʼabasi. 3 Mʉ̃a ũdusi maʉ̃ nedʉwʉrʉ zroma abaʉdebemata buruta kõbʉta beadaidu, mamina mawũã kõbʉra besi. Akʉza naʉ̃ drʉadebema jõmaʉ̃ta wãsida nedʉwʉrʉ mẽsi kʼaidu. 4 Yiwidʼisida dragonʼa iya zareata diasi baera nedʉwʉrʉ mẽsiʼa, akʉza yiwidʼisida nẽdʉwʉrʉ mẽsiʼa, mõbe naʉ̃ta jarasida: «¿Kʼaita nedʉwʉrʉ kĩrãkʼabʉpe? ¿Akʉza kʼaita iyiʉ̃me yõseabʉpe?». 11 Ũdusi awuru nedʉwʉrʉ mẽsiata egorodeba ʉ̃tʉ uruta. Kachu ũme erbasi korderode kĩrãkʼa, mamina bedʼea jʉ̃drʉsi dragon kĩrãkʼa. 13 Nekʼãrẽ zromata obʉ; ʉ̃tʉba pʉreata zebibʉ egoroeda ẽbẽrarãba ũdudamarẽã. 14 sewabʉ drʉade panʉrãra nekʼãrẽ omarẽã iduaribidadeba nedʉwʉrʉ mẽsia nãã, jarabʉ naʉ̃ drʉade panʉraʼa parãnamarẽã nedʉwʉrʉ mẽsia kĩrãkʼabʉta, iyira kuchoba kõbasimina bei ẽ basi. 15 Iduaribisi zokʼaibamarẽã nedʉwʉrʉ mẽsia kĩrãkʼa parãbʉta, iyita bedʼeamarẽã akʉza beabimarẽã yi nedʉwʉrʉ mẽsia parãnama yiwidʼi ẽãta. 16 Nedʉwʉrʉbara ẽbẽra jõmaʉ̃ta zok’asi (yi zromata, wiñabʉta, platabarata, k’ãrẽ neẽãbʉta, yãrã nezok’a ẽãta akʉza yãrã nezok’ata), ãyi juwarare seyabisi mawũã ẽ bʉrʉ ãyi datrʉde bʉbisi. 17 Mia k’aita ne edabe ẽ basi maʉ̃ nedʉwʉrʉ trʉ̃ta seya erba ẽ basibʉrʉ mawũã ẽ bʉrʉ iyi numero trʉ̃ta erba ẽ basibʉrʉ.