Esdras

6 Noko Ciroba Persiade zok’a jũdrʉside jõma aripe berabarimarẽã Jeowaba jaradata Jeremianeba Jeowaba osi nok’o Ciroba iya zok’abada ẽbẽrãra jõmaʉ̃’a jaramarẽã akʉza naʉ̃ta bʉmarẽã: 2 «naʉ̃ta jarabʉ nok’o Ciro Persiadebemaba, Jeowa Daizeze ũtʉbemaba mʉ̃a jõma diabʉrʉ naʉ̃ drʉa jõma zok’amarẽã akʉza mʉ̃a’a jarasi deta omarẽã Jerusaléne, maʉ̃ra Judadebʉta. 3 Jari jõma Jeowa pʉwʉrʉare bʉra, Daizeze juwuad’e jẽda wãidua Jerusalénma Judádebʉma akʉza ara oidua Daizeze dera Israel Daizeze dera, iyira Daizeze wãrĩnuara, iyi dera Jerusaléne bʉa. 4 Ẽbẽra baduta jãpeba zedatabʉbʉrʉ ẽbẽra mayi kawabʉba k’arebadaibara, diadaibara orota, platata akuza pakarata adewara maraba nek’ãrẽ jõma soiduba diakĩrãbʉta Daizeze Jeowa deita. 5 Mawũẽrã Judádeba akʉza Benjamineba zebʉrʉta zok’abadarata, saserdoterata akʉza levitarata, naʉ̃ra jõma Daizeze wãrĩnuba wãkĩrãbidarata nek’ãrẽ jõma osida wãita Jeowa de ara odaita Jerusalénebʉma 6 akʉza ãyi kawapanʉrabara diasida orota, platata, pakata akʉza nek’ãrẽ biata Daizezeita. 7 Neida orãra kaʉ̃ Daizeze de opanʉra. Judiora zok’abʉraba akʉza judiora zõrãrãba, ara odayi Daizeze dera nãã iyi badamae. 8 Adewara judiora zõrãrã k’arebaita Daizeze de ara odaita, mʉ̃a naʉ̃ta omarẽã jarabʉ: ãya obarabʉ taʉ ẽ marẽãra, mesera pagaibara nokʼo plataba, maʉ̃ra zebʉ ẽbẽrarã do Éufrates juwa’ãkarebʉdeba, nok’oʼa plata diabʉdeba. 9 Ewariza Jerusalénebema saserdoteba widibʉta diaibara marabara ãya nek’ãrẽ badu nesidabʉta: torota, karnerota oprendaba diaita Daizezea, adewara tãta, netata, vinota akʉza aseiteta, 10 mawũã oprenda diayi Daizezea akʉza yiwid’idayi nok’o bari akʉza ãyi wũãwũã bari. 11 Akʉza mʉ̃a mara jarabʉrʉ abaʉba ũrĩ ẽ bʉrʉ mʉa zok’adata iyi deda bakuruta jidak’ãrãpe ʉ̃tʉba jirabibara, iyi dera jõmaʉ̃ra ã de baibara 12 Akʉza Daizezeba obibʉrʉ iyi trʉ̃ta mama bamarẽã, iya makenañi badu nok’ota akʉza pʉwʉrʉ maʉ̃ bedʼea ũrĩ ẽãta, adewara Daizeze de ãrĩbʉrʉta, maʉ̃ dera Jerusalénʼnebʉ. Mʉ̃ra Darío, mʉ̃a naʉ̃ta zokʼabʉrʉa. Mesera oidua». 13 Mawũã Tatenái (gobernador drʉa do Éufrates juwa’ãkarebʉta), Setar-Bozenáiba akʉza iyi kʼaidupanʉraba, mesera aripe osida jõma nokʼo Daríoba zokʼadata. 22 Siete ewari bayeda osida piesta pan ne oregea neẽã kobadata, Jeowaba ãyi jõmaʉ̃ta sobiabisi baera akʉza Jeowabara nok’o Asiria k’arebabisi Daizeze wãrĩnuara de parãita Israel Daizeze deta.