Zacarías

4 Angel mʉ̃me bedʼeanʉmanata jẽda zesi akʉza mʉ̃ta ʉrʉmabisi, ẽbẽra kʼãĩnʉmʉ ʉrʉmabibʉ kĩrãkʼa. 2 Mõbe iya mʉ̃aʼa widisi: «¿Kʼãrẽta ũdubʉ?». Mʉ̃a panʉsi: «Mʉ̃ara ũdunʉmʉ ĩbira juwa jiwini barabʉta oro omata akʉza maʉ̃ ʉ̃rʉ sãbʉta bʉta. Ĩbira siete barabʉta, mawũã ĩbira siete maʉ̃ ʉ̃rʉbʉ, juwa jiwini siete barabʉ. 3 Akʉza maʉ̃ kʼawa oliborata ũmebʉ, aba sãbʉ juwararebʉ, ababemata juwaʼãkarebʉ». 6 Mõbe iya mʉ̃a jarasia: «Naʉ̃ bed’ea Jeowaba jarabʉra Zorobabel’ita: ‹«Gorogororaba akʉza zareaba oẽbayi awuarabʉrʉ mʉ̃ jaure zareadeba oyi», jarabʉ Jeowaba, gorogorora nok’oba. 7 Katuma zroma, ¿k’ai bʉra? Zorobabel nãã, bʉra drʉa koribi bayi. Iya ãĩkʉbʉyi mõgara yi wãẽbʉta mõbe jõmaʉ̃ta jʉradayi «K’ãrẽ yibia, k’ãrẽ yibia»›». 8 Mʉ̃a jẽda ũrĩsi Jeowa bedʼeata. Iya jarasi: 9 «Zorobabel juwaraba ojʉ̃drʉsi maʉ̃ de jĩrʉrata akʉza iyi juwaraba parãnʉmʉsi. Akʉza kʼawuadaibara Jeowa gorogorora nokʼoba mʉ̃ta marama zokʼasita. 10 ¿Kʼaiba kʼãrẽ ẽ kĩrãkʼa akʉbʉ wiña jʉ̃drʉbʉrʉdera? Ãyira mejãcha sobiadai baera akʉza ũdudayi plomadata Zorobabel juwade. Naʉ̃ sietera Jeowa dabʉra, drʉa jõmaʉ̃nẽbʉ». 12 Akʉza mʉ̃a yi ũmeta widisi: «¿Kʼãrẽta jarakĩrãbʉ bakurura, olibo juwa jiwinirane ãyideba aseite ʉgʉ kuara drʉbʉra, tubo oro oma ũmeneba?». 14 Iya jarasi: «Naʉ̃ra, ũme jʉrʉdapeadara drʉa jõmaʉ̃ Yibari kʼawa edaubarabʉta».