Éxodo

13 Jeowaba jarasi Moisés’a: 2 «Mʉ̃ita neneẽã babira jõma wũãwũã nabemara yumakẽrãrãra israelitadebemara. Wũãwũã nabema yumakẽrã israelitaraneta, wũãwũã nabema yumakẽrã nedʉwʉrʉraneta mʉ̃re baera». 3 Maʉ̃ tẽã Moisésba jarasi pʉwʉrʉ’a: «Naʉ̃ ewarita kĩrãbeidua, naʉ̃ ewari Egiptodeba ẽdrʉdata, mara drʉa yãrã nezok’adeba Jeowaba ẽdrʉbisi iyi juwa zareaba. Maʉ̃ k’area koraidua nek’ãrẽ oreguea barabʉta. 4 Naʉ̃ ewaride ẽdrʉyi jedeko abib’de. 5 Jeowaba jarasi bʉ zõrãrãdebema kananeora drʉata diaita, ititaraneta, amorreoraneta, ebeoraneta akʉza jebuseoraneta, maʉ̃ drʉadera mejãchabasi lecheta akʉza kũrabari kũata. Iya bʉ mama erjʉ̃ẽbʉrʉde k’ãwũã obaibara, naʉ̃ ewarita naʉ̃ jedekode. 6 Ewari 6 bayeda koibara pan ne oreguea neẽãbʉta, ewari 7dera Jeowaita piesta oibara. 7 Ewari 7 bayedara koibara pan ne oreguea neẽãbʉta akʉza nek’ãrẽ oreguea barabʉta erba ẽ baibara, adewara bʉ bʉmaera pan oregueabʉta neẽ baibara. 8 Naʉ̃ ewaride naʉ̃ta jaraibara bʉ wũãwũã: Naʉ̃ta k’ãwũã obʉ kĩrãbeita, Jeowaba mʉ̃ k’area k’ãrẽ odata Egiptodeba ẽdrʉside. 9 Naʉ̃ k’ãwũã obʉrʉra bʉ juwade seyabʉ kĩrãk’abayi akʉza bʉ datrʉde abayi kĩrãbeita. Mawũã Jeowa ley’ra bʉ itaedebayi, Jeowaba ẽdrʉbisi baera Egiptodeba iyi juwa zareaba. 10 Poagaza naʉ̃ k’ãwũã zok’adata obaibara naʉ̃ ewaride akʉza naʉ̃ jedekode. 11  »Jeowaba bʉta kananeora drʉa eda edebʉrʉde (iya bʉ zõrãrã nabema bʉa diaya adama), 12 wagaibara jõma Jeowaita wũãwũãra nabema yumakẽrãrata akʉza paka wũãwũãra nabema yumakẽrãrata jõma maʉ̃ra Jeowade baera. 13 Burru wũãwũã nabemanera pagaibara obejaba iyi ẽdrʉbita. Mawũã paga ẽ bʉrʉ iyi bari, ochidauta bʉetaibara. Adewara, pagaibara bʉ wũãwũãra nabema ẽdrʉbita. 14 »Ʉ̃ra zeide bʉ wũãwũãba widira ¿k’ãrẽta jarakĩrãbʉ naʉ̃ba?, naʉ̃ta jaraibara, Jeowaba iyi juwa zareaba Egiptodeba ẽdrʉbisi drʉa dai pananamae yãrã nezok’abaside. 15 Paraonba daita idu wãbi ẽ baera Jeowabara ẽbẽra wũãwũã nabemata jõma makenasi akʉza nedʉwʉrʉraneta Egipto drʉade badara. Maʉ̃ k’area nedʉwʉrʉ wũãwũã nabema yumakẽrãta beapanʉ Jeowaita dai wũãwũã nabema yumakẽrã ẽdrʉbita. 16 Naʉ̃ra bʉ juwade seyobʉ kĩrãk’abayi adewara bʉ datrʉde buru tajʉ jʉ̃bʉ kĩrãk’abayi, Jeowaba ẽdrʉbisi baera Egiptodeba iyi juwa zareaba». 17 Paraonba pʉwʉrʉ Israel idu wãbisidera Daizezebara filisteora ode idu wãbi ẽ basi mamare arak’aitabasimina. Daizezeba jarasi baera: «Pʉwʉrʉta yõibara ãyi Egipto eda jẽda wãita krĩcha ẽ marẽã». 18 Maʉ̃ k’area Daizezebara pʉwʉrʉra drʉa ibʉawabʉde wãbisi mar Rojo k’awa. Akʉza israelitara Egiptodeba ẽdrʉsidera gorogorora yõ wãbari kĩrãk’a wãsida. 19 Moisésbara edesi José bʉwʉrʉrata. Josébara israel wũãwũãra naʉ̃ta omarẽã jarasi baera: «Wãrĩnu mara Daizezebara akʉya namaʉ̃ba edaidua mʉ̃ bʉwʉrʉrãra». 20 Israelitarãra Sucotdeba wãnata Ezam’mae besida, mamaʉ̃ba jʉ̃drʉsi drʉa ibʉawabʉta.