Proverbios

9 Buru biabara deta parãbʉrʉa; yi drʉ̃daʉra 7bʉta ara biʼia parãbʉ kʼãrẽ. 2 Chichira ara bia obʉ kʼãrẽ; binosida bia puerasi akʉza mesasida ara osi. 3 Zokʼa bʉesi iyi nezokʼa wẽrãra pʉwʉrʉ ʉ̃tʉabʉdeba jʉramarẽã: 4 «Yi kʼãrẽ kʼawua ẽ panʉrata, mʉ̃ma zeidua». Iya naʉ̃ta jarabʉ yi krĩcha neẽ kĩrãkʼa bera: 5 «Zeidua koidua mʉ̃ panta akʉza doidua bino mʉ̃a bia pueradata. 6 Idubʉidua kʼãrẽ kʼawua ẽ panʉra kĩrãkʼabʉta mõbe zokʼaipanaidua; bʼaidua audre bia kʼawuabʉ ode». 10 Jeowaʼa wawia ũdubibʉdeba zebʉ buru biara, Neneẽãbʉ ʉ̃rʉ kʼawuaiba ũrĩ kʼawuabibʉ. 13 Yuwẽrã bia krĩchabʉ ẽãra kʼawua ẽkʉ. Mia kʼãrẽsida kʼawua ẽ. 14 Iyi puertaya jewedabʉ, iyi jewedabari ʉ̃rʉ, pʉwʉrʉ audre ʉ̃tʉabʉmae 15 akʉza jʉra trʉ̃bʉ yi ode berabari wãta, yi jipa ode wãta: 16 «Yi kʼãrẽ kʼawua ẽ panʉrata, mʉ̃ma zeidua». Iya naʉ̃ta jarabʉ yi krĩcha neẽ kĩrãkʼa bera: 17 «Bania zrʉgadapeadara kũabʉ akʉza pan mera kobʉra jipa warra». 18 Mamina ãyara kʼawua ẽ mamabʉta beibʉrata akʉza iya mama eda trʉ̃bʉra bewãrã dedebʉta.