Josué
12 Israel mebẽrãneba zebʉta 12 yumakẽrãra jidara, mebẽrãneba zebʉta yumakẽrã aba, 13 saserdotera Jeowa arca atʉpanʉba (iyira naʉ̃ drʉadebema Nokʼo), ãyi jĩrʉ jãba tõbaribʉrʉde Jordánʼnebema dota, Jordánʼnebema do ʉ̃tʉba zebʉra tumanʉma totoyi do ananʉminabari kĩrãkʼa». 14 Mawũẽ pʉwʉrʉ wãsidadera ãyi nʉmananeba, Jordán kĩrãbari naweda, saserdotera yi Arca bedʼea abarika zeda apanʉra wãbasi pʉwʉrʉ nãã. 15 Yi Arca apanʉ ñabasea Jordánʼena jʉ̃ẽbʉrʉdera akʉza saserdotera Arca atʉpanʉrabara ãyi jĩrʉra doya nebisida (Jordán dora do zromabasi neta jʉrepebarabʉ ewarirane), 16 bania do ʉ̃tʉba zebʉra tʉma totosi. Do zromanʉma totosi do ananʉminabari kĩrãkʼa, jĩgara, Adánmae, pʉwʉrʉ Zaretán kʼawabʉmae, mamina dora wãbʉside puza Arabáeda, iyiabaʉ puza Salado, põanʉma totosi, dora pinʉma totosi, mõbe pʉwʉrʉra berabarisida kĩrãre, Jericó kĩrãbita. 17 Saserdoteraba atʉpanaside Jeowa arca bedʼea abarika zedadebemata ãyira edebarabasi ẽjũã põasãde Jordán ẽzadra, jõma israelitarãra berabarisida kĩrãne ẽjũãra põasãnʉmʉne, pʉwʉrʉ jõma berariyeda Jordánʼneba.