Génesis

9 Paraonma nejue edebari nok’oba jarasi: «Idi jaraibara mʉ̃a nekayirua odata. 10 Paraon’ra kĩrʉsi iyi nezok’ara ʉ̃rʉ, maʉ̃ k’area zok’asi mʉ̃ta akʉza pan obari nok’oʉ̃me jenene nok’oba iyi deda karsel erbʉde eda bʉemarẽã. 11 Maʉ̃ tẽã, dai aba abaka iyabaʉ diamaside k’ãĩmok’ãrãsida akʉza daiba mawũã k’ãĩmok’ãrãdara bed’eata jarakĩrãbasi. 12 Mamina dai k’awabasi kʉ̃dra ebreodebemata, iyira jenene nok’o nezok’abasi. Daiba dai k’ãĩmok’ãrãda nebʉraside iya jarasi k’ãrẽta jarakĩrãbasita maʉ̃ra. 13 Maʉ̃ra jõma aripe berabarisi iya jarada kĩrãk’a: mʉ̃ra jẽda bʉsida mʉyi chuadamae mamina ababemara otajʉ̃ jirabʉsida». 14 Maʉ̃ k’area paraonbara Joséta jʉrʉ wãnamarẽã zok’asi, aramaʉ̃ta karseldebara meserabai wesida. Josébara iyi karara jõma wẽsi, awuru wua jʉ̃ k’ãrãpe mõbe paraon’inʉ jʉ̃ẽsi. 16 Joséba panʉsi paraon’a: «Mʉ̃ra k’ãrẽ ẽ. Daizezebʉrʉ jarayi k’ãrẽ nebia zeita paraon ʉ̃rʉ». 28 Paraon’a jarada kĩrãk’a, Daizezeba ũdubibʉrʉ paraon’a iya k’ãrẽ oita. 29 Egipto drʉa jõmaʉ̃mae yiko mejãchabayi poaga 7 bayeda. 30 Mamina maʉ̃ tẽã poaga 7 bayeda zeyi jarrabata Egipto drʉade, maʉ̃ba kĩrãduabiyi yiko mejãchabadara. Jarrababa ãrĩñi drʉara. 31 Mia k’aiba kĩrãbe ẽ bayi yiko mejãchabadata maʉ̃ drʉade, maʉ̃ tẽã jarraba zebʉrʉra mejãchabayi. 32 Paraonbara kĩrã ũme k’ãĩmok’ãrãsi maʉ̃ ʉ̃rʉ, Daizezeba maʉ̃ ʉ̃rʉ wãrĩnu aripe berabarita kriñasi baera, Daizezebara maʉ̃ra aranʉbai oyi. 33 » Maʉ̃ k’area paraonbara jʉrʉibara yumakẽrã jura k’awuabʉta akʉza buru biata, mawũã Egipto drʉata akʉmarẽã. 38 Aramaʉ̃ta paraonba jarasi iyi nezok’ara: «¿Dayirãbara naʉ̃ awuarara ũdudaika, k’ãwũã Daizeze jaure zarea barabʉra?». 39 Aramaʉ̃ta paraonba jarasi José’a: «Neẽ k’ãwũã bʉ kĩrãk’ara jura k’awuabʉta akʉza buru biata, Daizezeba naʉ̃ k’ãwũã berabarira jõma bʉa jarabʉrʉ. 40 Bʉa zok’ayi mʉ̃ dera. Jõma mʉ̃ pʉwʉrʉbara bʉ bed’eata ũrĩñi k’ãrẽ bed’ea neẽã. Mʉ̃trʉ abapai bʉ ʉ̃tabayi, mʉ̃ra nok’o baera». 55 Jarrabara aramaʉ̃ta Egipto drʉaidu zesi, maʉ̃ k’area mamabema ẽbẽrarãbara jarrababa zʉbʉria tei baera paraon’a widisida yikota. Maʉ̃ k’area paraonbara egipsiora jarasi: «Wãidua Josébʉidu akʉza oidua jõma iya jarabʉta».