Éxodo
19 Egiptodeba ẽdrʉdata jedeko ũbea babʉrʉde, maʉ̃ ewaride israelitarãra jʉ̃ẽsida drʉa ibʉawabʉ Sinaí’inʉ. 2 Ẽdrʉsida Refidimneba, maʉ̃ta jʉ̃ẽsida drʉa ibʉawabʉ Sinaíena, mamabesida katuma kĩrãbita. 3 Aramaʉ̃ta Moisés’ra wãsi Daizeze wãrĩnuara nãã b’aita. Jeowaba trʉ̃si katumaneba mõbe jarasi: «Naʉ̃ta jaraibara Jacob dedabema jara ũrĩbira naʉ̃ta israelitara’a: 4 Marabara ũdusida mayi dabʉba mʉ̃a egipsiora odara. Mʉ̃a nejõbʉ i ʉ̃rʉ edesi mʉ̃ma weita. 5 Maraba aripe ũrĩbʉbʉrʉ mʉ̃ nemita akʉza bed’ea abarika zedata opanʉbʉrʉ, pʉwʉrʉ mejãchabʉde marara mʉ̃ pʉwʉrʉbayi, naʉ̃ drʉa jõma mʉ̃re baera. 6 Marara mʉ̃ita nok’o saserdoterabayi akʉza pʉwʉrʉ k’ãrẽ jaigʉa neẽbayi. Naʉ̃ta jõma jarada israelitara». 7 Maʉ̃ tẽã Moisés’ra ze k’ãrãpe ãba jʉre edasi zõrãrã maʉ̃ pʉwʉrʉdebemata mõbe jõma jarasi Jeowaba zok’adata. 8 Aramaʉ̃ta mamabema pʉwʉrʉ jõmaʉ̃ba jarasida: «Daibara Jeowaba jõma zok’abʉra soiduba oyi». Aramaʉ̃ta Moisés’ra wãsi Jeowa jaraita pʉwʉrʉba jaradata. 9 Jeowaba jarasi Moisés’a: «Mʉ̃ra zeyi bajã paisosoanʉmʉne pʉwʉrʉba k’awuadamarẽã mʉ̃ra bʉme bed’eabʉta akʉza maʉ̃ daucha bʉta ĩjãnamarẽã». Moisésbara jõma jarasi Jeowa pʉwʉrʉba jaradata. 10 Maʉ̃ tẽã Jeowaba jarasi: «Wãra pʉwʉrʉidu neneẽã babira idi akʉza nʉ, sʉgʉbira ãyi wuara. 11 Ewari ũbeadera jʉ̃ãkopanaidua, ewari ũbeade zeyi Jeowara katuma Sinaí ʉ̃rʉ pʉwʉrʉ jõmaʉ̃ra dabʉ nãã. 12 Pʉwʉrʉra jarada katuma audura samabai jʉ̃ãibarata jarada: K’awuapanaidua katuma wã ze ẽ baita akʉza katuma audu wãna ẽ baita, yi ẽbẽra katuma tõbaridara waña beadaibara. 13 Yi ẽbẽra maʉ̃ tõbaridara, bʉara tõbaribe ẽ awuarabʉrʉ jĩgaʉba mõgaraba bataibara mawũã ẽ bʉrʉ drʉibara k’ãrẽ ẽ maʉ̃ra nedʉwʉrʉta mawũã ẽ bʉrʉ ẽbẽrata maʉ̃ra beibara, mamina karnero kachu pugabibʉrʉde katumaena zeseabʉ». 14 Maʉ̃ tẽã Moisés’ra katumaneba ze k’ãrãpe pʉwʉrʉra neẽã osi akʉza ãyi wuara sʉgʉsida. 15 Moisésba jarasi: «Jʉ̃ãkopanaidua ewari ũbeadera. Ãba k’ãĩraidua». 16 Ewari ũbeade diapeda ba mejãcha jʉrʉrʉa k’ãrãpe ba chidiba baesi bajã paisosoabasi katuma ʉ̃rʉ, mamaʉ̃ba ũrĩbasi kachu mejãcha jĩgʉa pugabʉta maʉ̃ k’area ẽbẽrarã jõmaʉ̃ta perabiba pididiasida. 17 Aramaʉ̃ta Moisésbara pʉwʉrʉ jõma ãyi karpa dedeba wãbisi Daizeze wãrĩnuarama. Ãyira katuma jĩrʉnebara besi. 18 Katuma Sinaíra jõma nãrĩ koʉganʉmasi Jeowata maʉ̃ ʉ̃rʉ zesi baera itarra nãrĩ koʉgabʉ kĩrãk’abasi akʉza jõma katumara mejãcha urebʉsawasi. 19 Kachu mejãcha puga bʉeda Moisésta bed’eabasi, maʉ̃ena Daizeze wãrĩnuaraba panʉibasi.