Génesis

16 Kõbebʉrʉ Labánbara kaurata ũme erbasi: Yi nabema trʉ̃ra Leabasi, yi tẽãbema trʉ̃ra Raquelbasi. 17 Leara biʼia kiruara ẽ basi. Mamina Raquelʼra jipa ẽbẽra wẽrã kĩrãwãreãbasi akʉza mejãcha nebiata ũdubibasi. 18 Jacob’bara Raquelta kãgasi baera jarasi Labán’a: «Mʉ̃ra bʉita trajakĩrãbʉ 7 poaga bʉ kau tẽãbema Raquel k’area». 19 Aramaʉ̃ta Labánba panʉsi: «Yibiabayi bʉa diaita badu yumakẽrãira. Mawũẽra nama bara mʉ̃me». 20 Mawũã Jacob’ra poaga 7 bayeda trajasi Raquel k’area, mamina mejãcha kãgabasi baera maʉ̃ra iyitara ewari bio ẽ basi. 21 Jacob’ba jarasi Labán’a: «Mʉ̃ara jõma osi. Diara mʉ̃ kimara iyiʉ̃me ãba k’ãĩta». 22 Aramaʉ̃ta Labánbara ãba jʉ̃re edasi ẽbẽrarã iyi de k’awapanʉta mõbe yiko mejãcha osi. 23 Mamina diamasi jidasi yi kau Leata mõbe edesi Jacobma maʉ̃me ãba k’ãĩmarẽã. 24 Maʉ̃ tẽã Labánbara yi kau Leara diasi nezok’a aba maʉ̃ trʉ̃ra Zilpábasi yi nezok’a bamarẽã. 25 Maʉ̃ nrʉemane, Jacob’bara ũdusi Leaʉ̃me ãba k’ãĩsita. Aramaʉ̃ta jarasi Labán’a: «¿K’ãrẽa k’ãwũã osi bʉa mʉ̃ra? ¿Mʉ̃ra bʉita Raquel k’area trajasi ẽka? ¿K’ãrẽa sewasi bʉa mʉ̃ra?». 26 Mamina Labánba panʉsi: «Namara kau tẽãbema diai naweda diapanʉ yi nabemata. 27 Naʉ̃ yuwẽrãʉ̃me naʉ̃ semanane juwa jidaira ora. Maʉ̃ tẽã naʉ̃ awuru wẽrãta erbayi bʉ poaga 7 bayeda trajada k’area». 28 Jacob’bara ĩjãsi, mawũã iyi maʉ̃ semanane juwa jidaibadara osi. Maʉ̃ tẽã Labánbara diasi yi kau Raquelta iyi kima bamarẽã. 29 Akʉza iyi kau Raquelʼa, Labánbara diasi nezokʼata aba maʉ̃ trʉ̃ra Bilhábasi yi nezokʼa bamarẽã