1 Pedro
5 Marane zõrãra edabʉa mʉ̃a jaraya, mʉ̃sida zõrãrã ãyibawara akʉza kʼawuabʉ Kristo sãwũã zʉbʉriadara akʉza mʉ̃sida ʉ̃ta wãine edabʉa: 2 obeja akʉbariba akʉbari kĩrãk’a akʉidua Daizeze obejara, zõrãrã akʉbariraba opanʉ kĩrãkʼa, oamane opanaraidua awuarabʉrʉ okĩrã oidua, mia jʉrʉraidua plata ũduita, awuarabʉrʉ zarea trajaidua, 3 mia yi zromata ũdubi ẽ baibara, Daizeze obejara, awuarabʉrʉ biata oũdubibara. 4 Obeja akʉbarira yi audre yibia zebʉrʉde, jidadayi burubari bagʉkata. 5 Abarika yumakẽrã warrara panʉrabara ũrĩbara yumakẽrã zõrãrãba jarabʉrʉta. Wuabemarabawarabʉdera eda krĩchapanʉta ũdubidaidua, Jeowaba kãga ẽ baera yi ʉ̃ta krĩchapanʉrãra mamina kãga iyara yi eda krĩchapanʉrãra. 6 Daizeze juwa edre bʼaidua, iya biʼia akʉmarẽã jʉ̃zaba, 7 mara bedʼea zromara jõma jaraidua, iyara marata krĩchabʉ baera. 8 Bia krĩchaidua mõbe ʉrʉma beaidua. Mara nejʉra Diarura mara audu leon kĩrãkʼa wãbari mara abaʉdebema jidaita. 9 Mamina iyiare wãraidua, awuarabʉrʉ maraba ĩjãbʉra zarea erpanaidua, kʼawuapanʉ baera dayirã mebẽrãbara iyabaʉ zʉbʉriata naʉ̃ drʉa jõmaʉ̃nẽ ũdupanʉta. 10 Mara ewari wiña zʉbʉriada tẽã, Daizeze iyi biaba so zʉbʉria akʉbʉba, mara ewari jõmaʉ̃nẽ Kristoʉ̃me bamarẽã jidadaba, mara biʼia jaradiayi. Daizezeba zarea babiyi akʉza teitea babiyi akʉza nekʼãrẽ zareabʉ ʉ̃rʉ bʉeyi.