Mateo

6 Awuarabʉrʉ bʉ yiwid’ibʉrʉdera bʉ kuartode eda wã k’ãrãpe, serrara yi puertara, mõbe yiwid’ira bʉ Zeze k’aiba k’awuada ẽ mae bʉ’a, mawũãra bʉ Zeze k’aiba k’awuada ẽ maeba akʉbʉba jẽda diayi nebiata. 7 Yiwidʼibʉrʉde iyabaʉ bedʼeata jararãra, wuabemara ẽbẽrarã drʉadebemaba obʉ kĩrãkʼa, ãya krĩchabʉ bedʼea bio jarabʉdeba ũrĩbʉta. 9 Marara k’ãwũã yiwid’idua: «Zeze ʉ̃tʉbema, bʉ trʉ̃ra neneẽã baide bʉa. 10 Zebira bʉ Nok’ota. Bʉa kãgata odaide bʉa ʉ̃tre akʉza nama egorodebida. 11 Idibema yikota dai’a diara; 12 Kĩrãduara daiba nekayirua obʉta daiba wuabema nekayirua kĩrãduabʉ kĩrãk’a. 13 Eda baebirara kayiruade baebibari krĩchade, awuarabʉrʉ ẽdrʉbira Diaru juwadeba». 14 Maraba kĩrãduapanʉbʉrʉ wuabemara nemitiata, mara Zeze ʉ̃tʉbemabida kĩrãduayi maraba nemitiara. 15 Mamina maraba kĩrãdua ẽ bʉrʉ wuabemaraba nemitia odata, mawũãra Daizezebida kĩrãdua ẽ bayi maraba nemitia obʉra. 25 »Mʉ̃a maraʼa jaraya: krĩcha zroma oraidua mara bebʉ kʼarea, kʼãrẽ koi kʼarea, kʼãrẽ doi kʼarea akʉza mara kakua kʼarea, kʼãrẽ jʉ̃ĩ kʼarea. ¿Audre yibia ẽka bebʉra yikoira, dayi kakuaira akʉza wuaira? 26 Biʼia akʉidua ibana ewaradebʉta. Ãyira ne u ẽ, mia jʉrepe ẽ, mia nekʼãrẽ wuagabarimae wuagada ẽ. Mamina Daizezebara ne diabʉ. ¿Kõbe marara ibanaira audre yibia ẽka? 27 ¿Maranebema krĩcha zroma obʉrʉba kʼaiba ʉ̃ta waribibari kodora ewari audre bʼaita? 33 »K’ãwũãena, nããra jʉrʉidua Daizeze Nok’ota adewara iya aripe omarẽãbʉta, mawũãtrʉ maʉ̃ jõma diaya. 34 Nʉ kʼãrẽ berabari kʼarea perabariraidua, nruemabida zei baera kʼãrẽ ʉ̃rʉ krĩcha zroma oita. Ewariza mejãcha bʉ baera bedʼea zromara.