1 Reyes

3 Iyira mejãcha perasi baera, beada ẽ marẽã mĩrʉ wãsi. Iyira jʉ̃ẽsi Beer-Seba, Judá drʉaidu, mõbe mama amaesi iyi kʼarebabarita. 4 Drʉa ibʉawabʉde wã kʼãrãpe, ewari aba babʉrʉde ũdusi bakuruta, mõbe mama edre jewedasi. Iya widisi beibimarẽã: «Jeowa, beara mʉ̃ra, wueta zokʼai bakĩrã ẽ, mʉ̃ra mʉ̃ nãã pananaira audre yibia ẽ baera». 5 Mawũẽra iyira bakuru edre kãĩkʉbesi. Mamina atiaʉde angelba tõbari kʼãrãpe iya jarasi:«Piradrʉra akʉza nekora». 6 Iya akʉside iyi buruare, ũdusi pan borokoa bʉta mõgarara jʉ̃wʉrʉbʉ ʉ̃rʉ kʉbʉta akʉza baniata kʉgʉrʉ zake aba kʉbʉta. Nekope akʉza bania dope jẽda kʼãĩsi. 7 Mawũãnata dããra babʉrʉde, Jeowa angelʼra akʉza jẽda zesi mõbe tõbaripe jarasi: «Piradrʉra,nekora. Mawũẽ ẽ bʉrʉ bʉita zarebayi ode wãira». 8 Mawũẽra iyira pidradrʉsi, nekosi akʉza nedosi. Maʉ̃ yikoba iyira zarea diasi ode wãita ewari 40 bayeda akʉza diamasi 40 bayeda Horebʼidu jʉ̃ẽita, Daizeze wãrĩnuara katumainʉ. 9 Iyira mõgara sobeade eda wãsi, mama ũnadrʉsi. Maʉ̃ta atiaʉde iya ũrĩsi Jeowa bedʼeata: «¿Kʼãrẽta obʉ Elías bʉra namara?». 10 Iya panʉsi: «Mʉ̃a wãrĩnu ũdubi zebʉrʉ Jeowarebʉta, Jeowa gorogorora Nokʼo. Israel pʉwʉrʉbara idubʉsi bʉme bedʼea abarika zedata, tegabʉesi bʉ altarʼra, beakʉasida bʉ propetarãra kuchoba akʉza mʉ̃trʉ abapaibida. Adewara atiara mʉ̃ra beakĩrãpanʉ». 14 Iya panʉsi: «Mʉ̃ara Jeowaʼa abapaiabʉrʉ yiwidʼibʉta ũdubibʉ, Daizeze gorogorora nok’ota. Israel pʉwʉrʉrabara amaesi iyiʉ̃me bedʼea abarika zedara akʉza jipa ãrĩsida altarʼrãra, adewara kuchoba beasida propetarãra, mʉ̃ta abapai zokʼaibesi. Atiara mʉ̃sida beakĩrãpanʉ».