Marcos
17 Herodesbara Juan buru koebibarira jʉrʉde zokʼasi kadenaba jʉ̃kʼarãpe karselde eda bʉeita, yi kima Herodías kʼãrẽa, iyira juwa jidasibasi yi mẽbẽã Filipo kimaʉ̃me. 18 Juanbara Herodesʼra jarada ʉ̃rʉ jarabasi: «Dayi mẽbẽa kimara jari kaĩbe ẽãta». 19 Maʉ̃ kʼarea Herodíasʼbara jʉrabasi Juanʼra, akʉza beakĩrã basi, mamina beabe ẽ basi iyara, 20 Herodesʼba bia akʉerbasi baera Juanʼra, akʉza wawiata ũdubibasi. Herodesʼbara kʼaʉbasi Juanʼra ẽbẽra biata akʉza aripe obʉta. Maʉ̃ba iyiʉ̃me bedʼea bʉrʉdera ũrĩkĩrã basi Juan bedʼeara, iya kʼãrẽ oi kʼawua ẽ basimina. 30 Jesu kʼaidubʉrara Jesu kʼaita ze kʼãrãpe nebʉrasida ãya kʼãrẽ jõma odata akʉza jaradiadata. 31 Jesubara jarasi: «Zeidua mʉ̃ kʼaidʉ, wãdrʉ dayirã miõ neẽma mawũã wiña enaʉ̃ita», ẽbẽra mẽjachaʉta wãpe akʉza zepanʉ baera ãyira ewari neẽbasi nekoita. 32 Maʉ̃ba wãsida jãbade jĩga, ãyira awa panaseabʉ mae. 33 Mamina ʉ̃kʉrʉ ẽbẽraba ũdusida ãyira wãta akʉza wuabema ẽbẽrarãbida kʼawuasida maʉ̃ta. Maʉ̃ kʼarea wuabema puwurudebema ẽbẽrarãsida jĩrʉne wãsida mesera, mõbe ãyi nãã jʉ̃ẽsida. 34 Jãbadeba ubaebʉrʉde iyara ẽbẽrarã mejãcha ũdusi akʉza so zʉbʉria akʉsi obeja akʉbari neẽ kĩrakʼa panasi baera akʉza nemejãcha jaradiasi.