Lucas

2 Maʉ̃ ewaride, César Augustoba osi leyta pʉwʉrʉ jõma registramarẽã. 2 (Ẽbẽrarã juachakata juachasidera Quiriniora Siriade gobernadorbasi). 3 Maʉ̃ba jõma wãsida aba abaka registrade ãyi pʉwʉrʉeda. 4 Josébida mawũã osi. Akʉza iyira David mebẽrãnebema baera wãrĩzesi Galileadeba Judeaeda, Nazaret drʉadeba David pʉwʉrʉeda, maʉ̃ra trʉ̃gapanasi Belén. 5 Wãsi registrade Maríaʉ̃me, iyiʉ̃me juwa jidadaʉ̃me (mawũã ĩjãnapeada kĩrãkʼa), iyi tobodobaside. 6 Mama bʉeda, iyi toi ewarita zesi. 7 Maʉ̃ta tosi, yi wũãwũã nabemata. wuaba buraeda kʼãrãpe nedʉwʉrʉ nekʼobada ʉ̃rʉ tusi, neẽ basi baera yi zedaraitara sama baita. 8 Maʉ̃ drʉadera obeja akʉbarirabara ewarade akʉpanasi ãyi obejara diamasi. 9 Aramaʉ̃ta Jeowa angelra ãyima edaʉnʉma deguesi, Jeowa ũnara ũnasi ãyi ʉ̃rʉ, mejãcha perãsi ãyira maʉ̃ kʼarea. 10 Mamina angelba jarasi: «Perãraidʉa, akʉidʉa, mʉ̃a maraʼa jarayi bedʼea biata, maʉ̃ba pʉwʉrʉ jõma sobiabigayi. 11 Idi tosida baera David pʉwʉrʉde ẽdrʉbibarita, maʉ̃ra Kristo dayirã Nokʼo. 12 Mʉ̃a jarayi maraba sãwũã kʼawuadaita: ũdudayi wũãwũãta wuaba bʉrabʉta nedʉwʉrʉra nekʼobada ʉ̃rʉ». 13 Aramaʉ̃ta angel kʼaidu kʼabana ʉ̃tʉ zesi gorogorora ʉ̃tʉbemata, mõbe Daizeze ʉ̃rʉ ibia bedʼeapanasi: 14 «Ʉ̃tre Daizeze ʉ̃rʉ ibia bedʼaidua, aduʼa beidua ẽbẽra Daizezeba bia akʉbʉrãra». 15 Angeleraba ãyi udubʉ kʼãrãpe ʉ̃ta wãsidadera, obeja akʉbarirabara ãyirai mawũãsida: «Belénʼena wãibara dayirãra, krĩcha ẽã sãwũã mawũã kʼawuaita kʼãrẽta berabarisita Jeowabara kʼawuabidata dayirã». 16 Maʉ̃ta ãyira ñabasea wãsida, aramaʉ̃ta ũdusida Maríata Joséʉ̃me, yi wũãwũãra nedʉwʉrʉra nekʼobada ʉ̃rʉ basi. 17 Ãyi ũdusidade ãya nebʉrasi wũãwũã ʉ̃rʉ kʼaseadapeadata. 18 Jõma yi ũrĩpanʉrãra yiya akʉdrʉasida obeja akʉbariraba nebʉrada kʼarea. 19 Maríabara wuagabasi maʉ̃ bedʼeara iyi krĩchade akʉza iyi so bitapai. 20 Obeja akʉbarirara jẽda wãsida, Daizeze ʉ̃rʉ ibia jara wãsida ãya ũduda kʼarea akʉza ũrĩna kʼarea jõma ãya jarada kĩrãkʼa basi baera. 21 Ewari ocho berabarida tẽã wũãwũãra sirkunsision odai ewarita zesi, iyira trʉ̃asida Jesús angelba jarada kĩrãkʼa biogoi naweda. 22 Adewara ãyira neẽã bai ewari zeside Moisés leyba jarada kĩrãkʼa, iyira ãyi kʼaidu edesida Jerusalénʼna Jeowa nãã ũdubita. 23 Jeowa leyde jarabʉ kĩrãkʼa: «Yi togaiba yumakẽrãta tobʉrʉdera neneẽãbʉta jaradayi Jeowaitara». 24 Sakripisiota diasida Jeowa leyba jarabʉ kĩrãkʼa: «Ãtorata ũme mawũã ẽ bʉrʉ kosira zakerata ũme». 25 Jerusalénʼne basi yumakẽrã kʼẽrẽpabʉta Daizezeʼa yiwidʼibʉta, iyi trʉ̃ra Simeón basi, iya jʉ̃ãbasi Israel ẽdrʉbidaita mõbe jaure zareara iyi ʉ̃rʉ basi. 26 Akʉza jaure zareaba iyaʼa jarasi bei ẽ bai basita Jeowa Kristo ũdukʼawua ẽ bedara. 27 Maʉ̃ta jaure zarea kʼarebadeba templo eda wãsi. Jesús yibarira Jesús eda templo eda wãside leyba jarabʉ kĩrãkʼa oita 28 wũãwũãra juwata jiraedasi, Daizezeʼa biga diasi: 29 «Dai Nokʼo Ʉ̃tʉbema idibʉrʉ bʉa bʉ nezokʼara kʼãrẽ krĩcha ẽã beibiseabʉ, bʉa jarada kĩrãkʼa 30 mʉ̃ dabʉba ũdubʉrʉ baera bʉa kʼaideba ẽdrʉbita, 31 zokʼabʉesi bʉa pʉwʉrʉ jõmaʉ̃ba ũdudamarẽã. 32 Iyara wubema pʉwʉrʉra ũnabiyi akʉza bʉ pʉwʉrʉ Israelʼra ẽdrʉbiyi». 33 Yibarirara kĩrãmigasida jipa ãyi wũãwũã ʉ̃rʉ nebia jarada kʼarea. 34 Mõbe Simeónba bedʼea bia jarada tẽã jarasi María wũãwũã papaʼa naʉ̃ta: «Ũrĩra naʉ̃ wũãwũãra zesi bioʉta Israelde baedamarẽã akʉza piradrʉdamarẽã akʉza iyi ʉ̃rʉ aña jaradayi 35 (kõbe bʉra, kuchoba zudaya bʉ soma) mawũã kʼawuaita ẽbẽrarãba kʼãrẽta erbʉta ãyi sode». 36 Akʉza mamara basi propetisa Anata, iyira Fanuel kau basi tribu Aserdebema basi. Iyira yõdrara basi, iyi juwa jidada tẽã poaga siete pai basi yi kimaʉ̃mera 37 maʉ̃ta pẽdra basi atiara 84 poagabʉ. Iyira nrʉemaza wãbasi templo eda, mama ewaride akʉza diamasi soiduba yiwidʼibasi adewara ayuno obasi. 38 Aramaʉ̃ta ãyima jʉ̃ẽsi, mawũẽra biga diasi Daizezeʼa akʉza jõmaʉ̃ʼa jarasi wũãwũã ʉ̃rʉ ẽbẽrarã Jerusalénʼne ãyi ẽdrʉbimarẽã jʉ̃ãpanʉra. 39 Jõma Jeowa leyba zokʼabʉ oda tẽã, jeda wãsi Galileaeda ãyi pʉwʉrʉ Nazaretʼeda. 40 Wũãwũãra zareabara wari wãsi, krĩchabara akʉza buru biabara wari wãsi. Adewara iya obadadeba Daizezera sobiabasi. 41 Poagaza yibarirãra Jerusalénma wãbasi Paskua piestade panaita. 42 Iyi 12 poagabaside Jerusalénma warizesida poagaza opanana kĩrãkʼa. 43 Piesta jõna tẽã ãyira jẽda wãbasi, mamina Jesúsra aribia Jerusalénne besi, yi barirabara kʼawuada ẽ basi maʉ̃ra. 44 Ãyara krĩchasida Jesúsra ãyibawara uruta, ewari aba basi ode panʉta. Aramaʉ̃ta jʉʉrʉ jʉ̃drʉsida Jesúsra yi mebẽrãne akʉza neũdukʼawuarane. 45 Mamina ũduda ẽ basi baera ãyira jẽda wãsida akʉza Jerusalénʼna, badumae jʉrʉsida ãyara. 46 Ewari ũbea babʉrʉde Daizeze deda ũdusida, nejaradiabarira ẽzadra jewedabʉta, mama ũrĩbasia ãya jaradiapanʉta akʉza ãya’a widibasia. 47 Yi iyi ũrĩpanʉrãra yiya akʉdrʉapanasi, ũdusida baera iyara biʼia ũrĩbasita akʉza iya sãwũã panʉbasita. 48 Yibariraba iyi jẽda ũdusidadera jipa ĩjãna ẽ basi, yi papaba mawũãsi: «Wau zake, ¿kʼãrẽa kʼãwũã obʉrʉ bʉa daira? Kʼawua ẽ bʉa kʼãrẽãba krĩcha o jʉrʉbʉdata daiba bʉra». 49 Mamina iya panʉsi: «¿Kʼãrẽa jʉrʉpanasi mʉ̃ra? ¿Kʼawuada ẽ basika mʉ̃ra mʉ̃ zeze deda bʼaibarabasita?». 50 Mawũãsidu ãyara ũrĩna ẽ basi iyara kʼãrẽta jarakʉasita. 51 Mõbe wãsi ãyibawara jẽda Nazaretʼeda akʉza ãya jarabʉrʉdebasi. Yi papaba jʉra kʼawua wuagabasi maʉ̃ra bedʼeara iyi sode. 52 Jesura wari wãsi akʉza audre buru biaba wãsi adewara Daizezeba bia akʉbasi akʉza ẽbẽrarãba.