Hebreos

6 Maʉ̃ba dayirãba nekʼãrẽ Kristo ʉ̃rʉ nãã kʼawuadara bia kʼawuapanʉ baera, zarea odaibara audre bia kʼawua wãita, mawũã dayirãba nããra kʼawuadata jẽda iyabaʉta krĩcha ẽ baita, maʉ̃ra nãã kʼawuadara naʉ̃rata iyi, daya kayirua oda kʼarea jẽda krĩchaita, Daizeze ʉ̃rʉ ĩjãita, 10 Daizezera jipabʉ baera maraba opanʉra kĩrãdua ẽ akʉza iyi trʉ̃ kãga ũdubipanʉsida, iyi pʉwʉrʉta kʼarebasida baera akʉza kʼarebapanʉ baera. 11 Mamina kãgapanʉ mara aba abakaʉba ũdubidamarẽã zokʼeapanʉta, mawũã maraba nebia mejãcha jʉ̃ãpanʉta jidadamarẽã, 12 marata zakeberre bada ẽ bamarẽã, awuarabʉrʉ odaidua ĩjãbʉba akʉza jʉ̃ãbʉba nebia ũdudaide kĩrãkʼa. 13 Daizezeba Abrahán bedʼea bia jarasidera, iyi kʼarea wãrĩnuta jarasi, neẽbasi baera kʼai kʼarea maʉ̃ oita jaraira. 14 Iya jarasi: «Mʉ̃a wãrĩnu nebiata diayi akʉza wãrĩnu mʉ̃a bʉra eababiyi». 15 Mawũã Abrahánba jʉ̃ãbʉta ũdubida tẽãbʉrʉ, diasia naʉ̃ nebia diaya adara. 18 Nekʼãrẽ ũmene Daizezera sewa nebʉra jarabe ẽ, maʉ̃raneba dayirã mĩrʉ wãnapeadarata so zarea erpanamarẽã nebia soiduba jʉ̃ãita. 19 Dayirãba jʉ̃ãpanʉra, wãrĩnu akʉza teiteabʉ, maʉ̃ra nek’ãrẽ zʉgʉaba jãba aña wã ẽ baita k’arebabʉ kĩrãk’abʉ dayirã bebʉta akʉza wua ãbʉdeare wãbari, 20 mama eda wãsi yi nãã edebarita, maʉ̃ra Jesús, iyira sumo saserdote ba zesi ewari jõmaʉ̃nẽ, Melquisedec bada kĩrãkʼa.