Hechos

27 Aramaʉ̃ta edesida Sanedrínma. Maʉ̃ba saserdotebara widisi. 28 Jarasi: «Daibara jarasida kaʉ̃ yumakẽrã trʉ̃nera jaradiada ẽ marẽã. Mamina, mawũãsidu marabara jaradiasida Jerusalénʼne jõmaʉ̃ra. Kãgapanʉ jaradamarẽã daiba beasidata kaʉ̃ yumakẽrãra». 29 Pedroba wuabema Jesu kʼaidu panʉrabawaraʉba panʉsida: «Oibara Daizezeba zokʼabʉta yumakẽrãraba zokʼabʉ oi kaude. 30 Dai yibarira naenabema Zezeba piradrʉbisi Jesura, maraba beadapeadata bakurude juwa tachi. 31 Daizezebara iyi juwarare Nokʼo babisi ẽbẽrarã ẽdrʉbimarẽã akʉza Israelra jẽda krĩchadamarẽã, mawũã ãyi nemitiata kĩrãduamarẽã. 32 Dai jõmaʉ̃ba kʼawuabʉda naʉ̃ra akʉza jaure zareabida. Daizezebara diasi naʉ̃ jaure zareara iyi Nokʼo kĩrãkʼa akʉpanʉrabʉrʉ». 33 Ãya maʉ̃ ũrĩbʉdadera mejãchade kĩrũsida jipa akʉza beakĩrãsida. 34 Pariseo abaʉba, yi trʉ̃ra Gamaliel, iyara kʼawuabasi Moisés Leydebemata, maʉ̃ba wawidebasi. Aramaʉ̃ta maʉ̃ra piradrʉsi Sanedríne, mõbe jarasi ãĩ ededamarẽã maʉ̃ra yumakẽrãra atiaeda. 35 Maʉ̃are jarasi wuabemara: «Israelitadebema yumakẽrãra, biʼia krĩchaidua maraba kʼãrẽ oi krĩchapanʉra naʉ̃ra yumakẽrãra ʉ̃rʉ. 36 Krĩchaidua naʉ̃ta, dããraba Teudasba jarasi iyira yi zromata akʉza yumakẽrãra 400 iyi kʼaidupanasi. Mamina iyi beasidadera iyi kʼaidu badarãra jõma aña wãsida, mamaʉ̃ba yẽta wua bedʼea ẽ basi iyi ʉ̃rʉra. 37 Maʉ̃ tẽã ʉ̃tʉzesi Judas Galileadebemata, ẽbẽrarã jʉachanʉmʉ ewaride. Ẽbẽra mejãchaʉta iyi kʼaidu wãsida. Naʉ̃ yumakẽrãsida beisi, maʉ̃ tẽã iyi kʼaidu badarãra jõma aña wãsida. 38 Maʉ̃ba mʉ̃a mara jaraya: Kʼãrẽ oẽa idubʉdamarẽã kaʉ̃ra yumakẽrãra. Ãya opanʉta ẽbẽranebʉrʉ maʉ̃ra jõña. 39 Mamina, maʉ̃ra Daizezedeba zebʉbʉrʉ mia abaʉba jõbida ẽ bayi. Maʉ̃ba bia krĩchaidua Daizezeʉ̃me yõna ẽ marẽã marara». 40 Aramaʉ̃ta ũrĩsida iyi bedʼeara. Mawũã jẽda trʉ̃sida apostolerãra akʉza. Posida, mõbe jarasida Jesu trʉ̃ ʉ̃rʉ wua jaradiada ẽ marẽã, maʉ̃are idu wãbisida. 41 Ãyira sobia wãsida Sanedrínʼneba Daizezeba idu zʉbʉriabisi baera Jesu trʉ̃ kʼarea. 42 Ewariza enaʉ ẽã jaradiabasi bedʼea biata Jesús ʉ̃rʉ, templode akʉza deza deza.