Salmo

32 Sobiabʉ yi ẽbẽra iyi nemitia kĩrãduabʉdadera. 2 Sobiabʉ yi ẽbẽra Jeowa iyi nemitia jẽda kĩrãbe ẽãta akʉza yi soiduba wãrĩnuta jarabʉta. 3 Mʉ̃ chupeabaside nemitia oda k’area, mʉ̃ bʉwʉrʉra bagʉsi maʉ̃ne mejãcha krĩchabʉba. 4 Ewari jõmaʉ̃nẽ bʉ juwa zʉgʉabʉta mʉ̃ ʉ̃rʉ basi baera. Mʉ̃ra zarea neẽã totosi, bisia mejãchabʉba bania põasã obari kĩrãk’a. 5 Kõbebʉrʉ mʉ̃a bʉa’a jarasi mʉ̃a nekayirua odara, mʉ̃ara mera ẽ basi. Mʉ̃a jarasi: «Mʉ̃a nemitia odara Jeowa’a jarayi». Bʉara kĩrãduasi mʉ̃ nekayiruara akʉza mʉ̃ nemitiasida. 6 Yi kʼẽrẽpapanʉrãra bʉa yiwidʼ idayi bʉta ũduseabʉ wedara. Mõbe mia do zromabida kʼãrẽ oẽ bayi 7 Bʉra mʉ̃ mĩrʉbari, bedʼea zromaneba mʉ̃ra biʼia akʉbʉ, nemitiadeba ẽdrʉbi kʼãrãpe mʉ̃ta mejãcha sobiabiyi. 8 Mʉ̃a bʉra buru bia babiyi akʉza jaradiayi kʼãrẽ ode wãita, mʉ̃a bʉta akʉ kʼãrãmape ũrãgʼata diayi. 9 Kabayo akʉza mula kĩrãk’a krĩña ũrĩkĩrã ẽ panaraidua, jũkaraba tajũ k’ãrãpe zok’a k’awuaibara ãyi zareara ẽbẽraraba atʉi naweda. 10 Ẽbẽrarã kayiruara mejãcha zʉbʉriabʉ, mamina yi ẽbẽra Jeowade ĩjãbʉrãra Jeowa kãga jõkaba purrebaribʉ kĩrãk’abʉ. 11 Sobiaidua Jeowa k’area, marara yi k’ẽrẽpapanʉrara; sobiaba jʉraidua marara yi sode nebiata erpanʉrara.