1 Pedro

3 Yuwẽr̃a kima barabebara ũrĩbara mara kima bed’eara, ʉ̃kʉrʉba Daizeze Bed’ea ĩjã ẽ bʉrʉ, marabara ĩjãbiseabʉ mia k’ãrẽ bed’ea jara ẽã mayi sãwũã bʉdeba 2 ãya bʉta ũdusi baera k’ẽrẽpabʉta akʉza wawia ũdubibʉta. 3 Bari bia yoba ẽ baibara ãĩbʉrʉ (buda kape, nekʼãrẽ oro oma jʉ̃bʉde akʉza wua bia jʉ̃bʉde), 4 awuarabʉrʉ bʉ sotrʉ biabaibara, bʉra aduʼabaibara akʉza urumʉ̃rʉãbaibara, naʉ̃ra Daizeze dabʉ nããra yibia baera. 5 Mawũã yopanasi baera yuwẽrãra nawedabemata Daizeze ʉ̃rʉ ĩjãpananara ãyi kimara bedʼeata ũrĩpanaside, 6 Saraba Abrahán bedʼea ũrĩbada kĩrãkʼa akʉza wawia ũdubibada kĩrãkʼa señor jarabaside. Marara yi kaura, nebiata opanʉbʉrʉ akʉza perabia yi edebi ẽ bʉrʉ. 7 Yumakẽrã kima barabʉra, krĩcha biadeba mara kimaʉ̃me bia panaidua. Mara kimara biʼia akʉibara kʉgʉrʉ bogozoayawabʉ kĩrãkʼa, iyira yuwẽrã baera, ãyisida ewari jõmaʉ̃nẽ panai baera mara kĩrãkʼa, mawũã mara yiwid’ibʉra ũrĩmarẽã. 8 Mawũẽra mara jõma abarika krĩchaidua, wuabemara ʉ̃rʉ krĩchaidua, mebẽrã kĩrãk’a yiya kãgaidua, so borekea bʼaidua, adewara edabʉta krĩchaidua. 9 Awuruba kayirua obʉrʉde abarika oraidua, i jʉra bedʼeabʉrʉde abarika i jʉra bedʼearaidua. Awuarabʉrʉ nebiata jaraidua, marara maʉ̃ kʼarea trʉ̃sida baera, mawũã nebiata erpanamarẽã. 10 «Yi bia bakĩrãbʉra akʉza bia wãmarẽã kãgabʉra yi kiramera jʉ̃ibara kayirua bed’eaideba akʉza iba sewanebʉra jaraideba. 11 Jĩga bamarẽã yi kayiruadeba akʉza yibia omarẽã; jʉrʉmarẽã adu’a b’aita akʉza maʉ̃ta pẽwã wãramarẽã. 12 Jeowa dabʉra bʉ ẽbẽra biara ʉ̃rʉ, ũrĩbʉ mara yiwid’ibʉrʉdera, mamina Jeowara ãĩbʉ ẽbẽra nemitia obʉdebara. 14 Mamina, maraba nekʼãrẽ aripe opanʉ kʼarea zʉbʉriapanʉmina, sobiapanʉ. Ãyi kʼarea peraraidua akʉza mejãcha krĩcha oraidua. 15 Awuarabʉrʉ wawiara Kristota Yibari kĩrãkʼa mara sode, panʉña awabaibara bedʼea jaramarẽã widibʉdade nekʼãrẽ ʉ̃ra zei maraba jʉ̃ãbʉ ʉ̃rʉ, mamina maʉ̃ra oidua ibiade akʉza wawiade. 18 Kristora beima aba beisi dayirã nekayirua kʼarea wua bei ẽ baita, mawũã dayirã nemitia kĩrãduaita. Iyira nekayirua okabasimina zʉbʉriasi ẽbẽrarã nekayiruabari, mawũã Daizeze neũdukʼawua bamarẽã. Iyira yarade beisi, mamina jẽda zokʼaibabisida jaurede. 20 ãyara Daizezeba zokʼabʉta ũrĩna ẽ basi Noé ewaridera, Daizezebara jʉ̃ãbasi ãya nemitia opanʉta jẽda krĩchadamarẽã, Noéba jãba zroma mapãrañena, maʉ̃neba ẽbẽrarã wiña dodeba neneẽã ẽdrʉsida, jõmaʉ̃nẽ panasi 8. 21 Buru kʼoeibara atiara marasida ẽdrʉbibʉ (naʉ̃ba jarakĩrãkʉ ẽ yaraba nemitia obʉ idubʉita, awuarabʉrʉ jarakĩrãbʉ Daizezeʼa widibarata krĩcha biata diamarẽã) Jesu jẽda piradrʉdadeba. 22 Iyira Daizeze juwarare bʉ ʉ̃ta wãsi baera, iyaʼa diasida zokʼamarẽã angelerata, nekʼãrẽ zokʼabʉrata akʉza zareata.