1 Timoteo
3 Naʉ̃ bed’eata ĩjãseapanʉ: yumakẽrã aba zarea onʉmʉbʉrʉ zõrãrã b’aita, trajo biata kãgabʉ. 2 Maʉ̃ba zõrãrã kongregasion ʉ̃rʉra mia abaʉba ikayirua jarakabaibara akʉza kima abapai erbaibara, adewara iyi kakua biʼia zokʼa kʼawuabaibara, biʼia kricha kʼawuabaibara, kʼãrẽ daucha erbaibara, iyi deidu jʉ̃ẽbʉdade biʼia akʉibara akʉza biʼia jaradia kʼawuabaibara. 3 Beinʉma be ẽ, yõmia ẽ baibara akʉza iya kãgabʉkira oẽ ewari jõmaʉ̃nẽ, yõmia ẽ baibara mia mejãcha kãga ẽ baibara platara. 4 Akʉza yi mebẽrãra biʼia akʉ erbaibara, adewara yi wũãwũãrabara iya jarabʉ kĩrãkʼa odaibara. 5 Yumakẽrã abaʉba biʼia akʉ ẽ bʉrʉ yi mebẽrãta sãwũã akʉi Daizeze kongregasionʼra. 6 Ʉ̃rabʉrʉ buru koedabara obe ẽ maʉ̃ra, aukara krĩcha ẽ marẽã, abarika berabari ẽ marẽã Diaru berabarida kĩrãkʼa. 7 Adewara Daizeze odebʉ ẽãrabida akʉdaibara iyira ẽbẽra biata, mawũã mia abaʉta i kayirua bedʼeada ẽ marẽã iyi ʉ̃rʉ, mawũã oe baita diaruba omarẽã jarabʉta. 8 Abarika oibara zõrãrã kʼarebabarirabida, sewanebʉrʉ omia ẽ baibara, kʼẽrẽpa bʼaibara, adewara itua domia ẽ baibara, mia nezrʉgamia ẽ baibara, 9 baibara Daizezeba mia abaʉba kʼawua ẽ marẽã bʉ ĩjãine, mawũã krĩcha neneẽã erbaita. 10 Nããra oũdubibara ãya oseabʉta akʉza mia abaʉta i kayirua bedʼea ẽ bʉrʉ ãyi ʉ̃rʉ, mawũãra zõrãrã kʼarebabaribaseabʉ. 11 Abarika bʼaibara wẽrãrasida, kʼẽrẽpa bʼaibara, iyi kakua bi’ia zokʼa kʼawuabaibara akʉza kʼãrẽ jõma daucha obʼaibara. 12 Zõrãrã kʼarebabaribara kima ababai erbaibara akʉza yi wũãwũãra biʼia zokʼa kʼawuabaibara, adewara yi mebẽrãsida. 13 Yumakẽrãbara bi’ia zokʼapanʉbʉrʉ, ãyi ʉ̃rʉ bi’ia bed’eadayi akʉza jʉ̃ãnani bi’ia zokʼadamarẽã. Bi’ia bed’eabʉta Jesu ʉ̃rʉ ĩjãbʉta.