Filipenses

4 Mebẽrãra mʉ̃a kãgabʉrata akʉza ũdukĩrãbʉrata, marara mʉ̃ sobia akʉza buru jʉ̃bari, mʉ̃a jarada kĩrãkʼa dayirã Yibaride teitea panaidua, mʉ̃a kãgapanʉra. 2 Mʉ̃a widibʉ Evodiaʼa akʉza Síntiqueʼa abarika krĩchapanamarẽã dayi Yibari kĩrãkʼa. 3 Akʉza bʉa wãrĩnu kʼarebabʉ baera widikĩrãbʉ, kʼarebamarẽã naʉ̃ra wẽrãra zarea opanʉta bedʼea bia jaradiaita mʉ̃me, Clementeʉ̃me akʉza wuabemara mʉ̃ kʼarebapanʉrasida, ãyi trʉ̃ra bʉchu bebʉ librode. 4 Ewari jõmaʉ̃nẽ sobiapanaidua Daizeze k’area, mʉ̃a akʉza jaraya sobiapanaidua 5 Jõmaʉ̃ba kʼawuapanaibara marabara maya krĩchabʉta oẽãta. Nokʼora arakʼaitaba. 6 Mejãcha krĩcha oraidua, awuarabʉrʉ nek’ãrẽ badu berabarinʉmʉne soiduba yiwidʼidua, biga diaidua akʉza bʉ krĩcha obibʉta jõma k’awuabira Daizezeʼa, 7 adewara Daizeze neneẽãbʉbara jõmaʉ̃ra krĩchaira ʉ̃tabʉba wuagayi mara sora akʉza mara krĩcha Cristo Jesúsdeba. 8 Kõbebʉrʉ mebẽrã badua krĩchapanaidua wãrĩnuarata yi k’ẽrẽpabʉta, jõma aripe obʉta, neneẽãbʉta, jõma kãgadeba opanʉta jõma bia bed’eabibʉta, jõma sobiade opanʉta akʉza nejõma bi’ia jaraseapanʉta. 9 Oidua nekʼãrẽ mʉ̃neba kʼawuadata akʉza mʉ̃a diadata, mʉ̃a jarada ũrĩnata akʉza mʉ̃a oda maraba ũdudata, mawũã Daizeze neneẽãbʉra marabawara bayi. 11 Mʉ̃a naʉ̃ra jara ẽ mʉ̃ta zʉbʉrianʉmʉ baera, awuarabʉrʉ kʼawuasi sobia baseabʉta bedea zroma erbʉmina. 12 Mʉ̃ra ba kʼawuasi wikaʉba akʉza mejãcha erbʉdebida. Nekʼãrẽ badude kʼawuasi sãwũã sobia bʼaita jarrabʉde, nemejãcha erbʉde akʉza nekʼãrẽ neẽãne. 13 Nek’ãrẽ jõmaʉ̃ita zarea erbʉ, mʉ̃aʼa zarea diabʉdeba. 15 Mawũẽra, pilipensera, maraba bia kʼawuabʉ, bedʼea bia ũrĩkade ũrĩsidadera akʉza mʉ̃ Macedonianeba wãside, miõ kongregasionba mʉ̃ra kʼareba ẽ basi akʉza ĩjãna ẽ basi mʉ̃ kʼarebara, marabʉrʉ kʼarebasi, 17 Mʉ̃ara jʉrʉbʉ ẽ nebia diadamarẽã, awuarabʉrʉ mʉ̃ara kãgabʉ neta nebiadebamata audre wari wãmarẽã marane. 19 Maʉ̃bari Daizezeba nekʼãrẽ bia mejãcha erbʉdebemata mara diayi maya nesidabʉta erpanamarẽã Cristo Jesúsdeba.