2 Pedro

3 Maʉ̃ nãã kʼawuaibara maʉ̃ ewari jõbodoare ʉ̃tʉ zeita ẽbẽrarã ipidamiarata, odayi ãya okĩrãbʉta, 4 akʉza jaradayi: «¿Kʼãrẽba sãwũãsi zei adara? Dayirã zõrãrã beida ewarideba, jõma iyabanʉmʉ naʉ̃ drʉa parãnapeadaedaʉba». 7 Daizeze Bedʼeadeba, ãĩ wagabʉ kʼãrẽ, bajãta, egorota tʉbʉ pʉreaba makenaita, wuagabʉ kʼãrẽ iya kʼawua oi ewari zeyeda akʉza ẽbẽra kayirua makenañena. 8 Mamina naʉ̃ta kĩrãduaraidua: Jeowaitara ewari abara mil poaga kĩrãkʼabʉta akʉza mil poagara ewari aba kĩrãkʼabʉta. 9 Pikãga oẽ Jeowaba iya jaradara, ʉ̃kʉrʉ ẽbẽrarãba krĩchabʉ kĩrãk’a. Awuarabʉrʉ iyara kãgaba jʉ̃ãbʉ maraba kayirua obʉta jẽda krĩchamarẽã mawũã bei ẽ baita. 10 Mamina Jeowa ewarira nezrʉgamia kĩrãk’a zeyi. Ba mejãcha jururua nʉ̃maedaba nẽbayi bajãra, adewara nek’ãrẽ mejãcha jʉ̃wʉ̃rʉ̃bʉba dorrabari wãñi akʉza naʉ̃ drʉade nek’ãrẽ maʉ̃ ʉ̃rʉ bʉra jõmaʉ̃ba ũdudayi. 11 Nekʼãrẽ jõma kʼãwũã jõĩ baera, krĩchara mara sãwũã panaibarata. Odaibara Daizezeba zokʼabʉta akʉza iyiʉ̃me kʼẽrẽpabaibara 12 jʉ̃ãpanʉena akʉza ʉrʉma jʉ̃ãpanʉena Jeowa ewari zeyeda, maʉ̃ ewaridera bajãra bawãñi pʉreaba akʉza naʉ̃ ẽjũãne badasida jõma dorrabarikʉayi. 13 Bayi bajã yiwidita, drʉa yiwidita, mama neneẽbayi iyi bedʼeaba jarabʉ kĩrãkʼa akʉza mama nek’ãrẽ aripe obayi. 14 Maʉ̃ kʼarea mʉ̃a kãgabʉrãra, maraba maʉ̃ta jʉ̃ãpanʉ baera nekʼãrẽ jõma oidua maʉ̃ zebʉrʉde kayirua neẽã, neneẽã akʉza aduʼa ũdumarẽã. 17 Maʉ̃ kʼarea mʉ̃ nekãgara, naena naʉ̃ ʉ̃rʉ kʼawuapanʉ baera jʉra kʼawuapanaidua yi sewabi ẽ baita ẽbẽra kayiruaraba obʉa, mawũã mara zareapanʉta aduada ẽ baita.