Revelación

18 Maʉ̃ tẽã mʉ̃a ũdusi awuru angel ʉ̃tuba eda ateibasita, iyara nekʼãrẽ mejãcha ʉ̃rʉ zokʼaseabasi, naʉ̃ drʉara ʉ̃na nʉmesi iyi nebiaba. 2 Iya nemi jĩgʉa jarasi: «¡Udogo Babilonia zromara! ¡Idibʉrʉ udogo’a! Maʉ̃ne edara angelera kayiruata duanina, mama nemitiata mejãcha opanina. Akʉza mama mĩrʉpanʉ ibana kayiruata jõmaʉ̃ba jʉrata. 3 Pʉwʉrʉra naʉ̃ drʉa jõmaʉ̃nebemarãra zʉbʉriasi iyi kĩrʉbideba, iya kayirua obʉdeba nokʼora naʉ̃ drʉadebemarãra iyiʉ̃me ãba kaĩsida, akʉza ne nẽdobarirã naʉ̃ drʉadebemarara nemejãcha barabesi iya mejãcha kayiruata obasi baera». 4 Ũrĩsi bajãneba bed’ea jarabʉta: «Ãĩ wãidua kaʉ̃nebara, mʉ̃ pʉwʉrʉra, maraba iyide kĩrãk’a kayiruata okĩrã ẽ bʉrʉ oraidua akʉza iyi kĩrãk’a zʉbʉria bakĩrã ẽ bʉrʉ. 5 Nemitia iya obʉra ʉ̃tʉ bajãinu jʉ̃ẽsi baera, adewara Daizezebara nemitia iya obʉra kĩrãdua ẽ. 6 Abarika ora iya obada kĩrãkʼa. Mawũã, dos veces ora iya nekʼãrẽ ozebʉrʉ kʼarea. Copa ũme jue diara iya jue diadaira. 7 Ũta krĩchabasi iyira mõbe iyara ne mejãcha erbasi zʉbʉriabidʉa iyi kʼawua ẽãyeda. Iya jarabʉ baera ‹Za chʉ mʉ̃ra; za jewedabʉ mʉ̃ra nokʼo wẽra kĩrãkʼa; mia pẽdra ẽ mʉ̃ra mõbe zʉbʉriaka bayi›. 8 Maʉ̃ k’ãrẽã ewari abaʉde zeyi iyi zʉbʉriara beita, puata, akʉza jarrabata, mõbe iyira tʉbʉde eda daucha babʉedayi, Jeowa Daizeze mejãcha zarea barabʉba kʼawua osi baera. 9 «Nokʼora naʉ̃ drʉadebemara iyiʉ̃me ãba kaĩbadarãra akʉza iyideba nekʼãrẽ mejãcha erbadarãra ãya ũdubʉrʉde iyi sãwũã pʉrea koʉga bʉsita mejãcha jẽgadayi iyi kʼarea pʉaba mejãcha jẽgadayi. 10 Mõbe iyi kʼarea perasida baera iyi sãwũã zʉbʉrianʉmʉ ũdui jĩgaraʉba jaradayi: ‹Zʉbʉriare, zʉbʉriare, pʉwʉrʉ zromara, Babilonia, pʉwʉrʉ mejãcha zarea erbadara bari ora abaʉde neẽãdogo bʉra›. 11 «Adewara ne nẽdobarirãra mejãcha jẽgadayi akʉza bia ẽã barabayi iyi kʼarea wua neẽ bai baera kʼaiba edaita ãya ne nẽdoi erbadara: 12 oro mejãcha erbadata, plata, mõgara kĩrãwãreãrata, perlata, lino biata, wua purpurata, sedata, wua kuara eskarlatata, nekʼãrẽ mejãcha parãkʉadata bakuru tũãpoadeba akʉza nekʼãrẽ mejãcha parãkʉadata marfildeba akʉza bakuru biaraneba, kobre, jiorro mawũã ẽbʉrʉ mármol, 13 Akʉza kanelata, ne warra Indiadebemata, insiensota, nẽdraga tũãpoabʉta, olíbanota, binota, oliva dragata, arina pichiata, trigo, pakarata, obejarata, kabayorata, karrorata, nezokʼarata akʉza ẽbẽrarãta. 14 Mawũã, nekʼãrẽ bia bʉa mejãcha erbakĩrãbadara neẽãdogo akʉza jõma nebia bʉa erbadara kĩrãwarẽabadara neẽãdogo bʉitara. Wua jẽda neẽbayi. 15 »Ne nẽdobarira naʉ̃ nẽdopanananara akʉza naʉ̃neba plata mejãcha barakʉadarara ara jĩga edebarabayi iyi kʼarea perapanʉ baera, jẽgadayi mõbe bia ẽã kʼãrãpe 16 jaradayi: ‹Zʉbʉriare, zʉbʉriare pʉwʉrʉ zromara, lino biaba wua jʉ̃ edenʉmʉra, purpuraba, eskarlata kuaraba akʉza nekʼãrẽ mejãcha oro oma jʉ̃badara, mõgara biaraba akʉza perlaraba 17 bari ora abaʉde nekʼãrẽ bia mejãcha erbadara neẽãdogo›. «Akʉza jõma barko yibarirara doeda wãdʉanurata, marinerorata akʉza jõma pusade trajapanʉraba ara jĩgaʉba akʉsida 18 Pʉrea koʉganʉmʉta ũdui ãya jʉrapanasia: ‹¿Saʉ̃ pʉwʉrʉta yi zroma basi naʉ̃ kĩrãkʼa?› 19 Itarra buruma jamapo kʼãrãpe, jẽgape bia ẽã jʉrapanasi: ‹Zʉbʉriare, zʉbʉriare pʉwʉrʉ zromara, jõma barko barabadarãra nekʼãrẽ mejãcha barasida iyi kʼarebadeba, mõbe bari ora abaʉde neẽãdogo›. 20 «Sobiaidua bajãnebera iyi sãwũã berabarida kʼarea, nebia obʉrasida sobiaidua, Jesús k’aidubʉrasida, adewara propetarasida. Daizezeba iyira k’awua osi baera mara kʼarea». 21 Angel zarea barabʉba jiraedasi mõgara zroma yu kĩrãkʼa bʉta mõbe batabʉenʉmʉne pusaeda jarasi: «Mõgara mesera batabʉedai kĩrãk’a Babilonia pʉwʉrʉ zromara uda batabʉedayi. Wuara ũdudakabayi maʉ̃ra». 22 Arpa zapanʉrãra, trãbi zapanʉrãra, flauta zapanʉrata mawũã ẽ bʉrʉ trompeta zapanʉrata wuara ũrĩna ẽ bayi bʉ bʉmaera akʉza nekʼãrẽ awuru parãbʉta wuara neẽ bayi bʉ bʉmaera. Mõgara zroma yu kĩrãkʼabʉra wuara ũrĩ ẽ bayi bʉ bʉmaera. 23 Mia abaʉ ĩbirãta jẽda ʉ̃na ẽ bayi bʉ bʉmaera, mia juwa jidai nemisida ũrĩ ẽ bayi, jõma bʉ ne nẽdobarirãra platabarabasi baera naʉ̃ drʉadera akʉza bʉa sewakuasi baera pʉwʉrʉrãra bʉa nekʼãrẽ jaidebema obadadeba. 24 Mawũã maʉ̃ne ũdusi propetara wata, nebia obadaraneta akʉza jõma beadaraneta naʉ̃ drʉade.