Éxodo

27 Oibara altarta bakuru akasiaba akʉza yiya b’aibara 2 metro 20 sentimetro, yi ʉ̃tʉata b’aibara 1 metro 30 sentimetro. 2 Maʉ̃ra yiya kimarenebemane kachubara oidua maʉ̃ra kachura altardebemabayi. Maʉ̃ tẽã altar’ra kobreba jõma chiratʉra. 3 Oibara baldeta itarra bʉeita akʉza oibara palata, taza zromata, kusarra kimia chubeta akʉza epedekota. Jõma maʉ̃ra kobre oma b’aibara. 4 Oibara altarta jʉrrʉjʉrrʉa, maʉ̃ jʉrrʉjʉrrʉara oibara kobreba. Adewara yiya kimarenera aniyota bʉeibara maʉ̃ra kobre oma b’aibara. 5 Jʉrrʉjʉrrʉabʉra altardera ẽzadra bʉeibara mawũã bʉebʉrʉde yi oriyadeba idʉ bʉeibara. 6 Adewara, oibara bakuru maʉ̃ bakurura oibara akasiaba maʉ̃ra altar’ita adewara chiratʉibara kobreba. 7 Naʉ̃ bakuruta aniyora bʉraza yiya bʉera altar edeita. 8 Altar’ra arabia sobea b’aibara akʉza bakuru oma b’aibara. Maʉ̃ra jõma aripe oibara mʉ̃a katumane ũdubida kĩrãk’a. 9  »Tabernakulo audura ewara erbara. Akʉza maʉ̃ ewara audura purra jirabʉda, maʉ̃ra linoara b’aibara akʉza b’aibara 44 metro bareare. 10 Drʉ̃daʉta oibara 20 akʉza maʉ̃ abidabarita 20, maʉ̃ra jõma kobre oma b’aibara. Adewara drʉ̃daʉta jʉ̃ẽkʉbidabarita akʉza yi aniyota jõma plata b’aibara. 11 Wãdearebida wua yi drazoata b’aibara 44 metro. Akʉza yi drʉ̃daʉta 20 b’aibara adewara yi abidabarita 20 b’aibara maʉ̃ra jõma kobre oma b’aibara, adewara drʉ̃daʉ jʉ̃ẽbarita akʉza yi aniyota maʉ̃ra plata oma b’aibara. 12 Juwa’ãkarera wuara ewa b’aibara, yi joʉbʉata 22 metro akʉza drʉ̃daʉta b’aibara 10, adewara yi abidabarita b’aibara 10. 13 Wuara ewa b’aibara 22 metro yi joʉbʉata. 14 Akʉza wuara ewa b’aibara 6 metro 60 sentimetro, adewara yi drʉ̃daʉta b’aibara ũbea akʉza yi abidabarita ũbea b’aibara. 15 Ababemanebida wuara ewara b’aibara 6 metro 60 sentimetro akʉza drʉ̃daʉta erbaibara ũbea adewara yi abaisida ũbea b’aibara. 16  »Eda wãbarimaera wuara b’aibara 8 metro 80 sentimetro yi drazoata akʉza kasu b’aibara ilo pãwãrabʉba, ilo batatabʉba, ilo purruba akʉza linoaraba eda wãbarimaera drʉ̃daʉ kimare b’aibara akʉza yi abaita kimare b’aibara. 17 Jõma drʉ̃daʉ audu b’aira aniyo b’aibara, maʉ̃ra plata oma b’aibara akʉza yi jʉ̃ẽbarisida plata oma b’aibara adewara yi abidabarira kobre oma b’aibara. 18 Yi ewarade b’aira bayi 44 metro yi drazoata akʉza yi joʉbʉata 22 metro bayi adewara yi ʉ̃tʉata 2 metro 22 sentimetro bayi maʉ̃ audu purra b’aira wua linoara b’aibara, adewara yi abaira jõma kobre omabayi. 19 Nek’ãrẽ jõma tabernakulodebʉta akʉza tabernakulode zok’apanʉta adewara tabernakulo jʉ̃ãsubʉta adewara ewarade jʉ̃ãsubʉta jõma kobre oma b’aibara. 20  »Adewara jarada israelitara olibo aseitearata wedamarẽã ĩbira ʉ̃na erbaita mawũã ĩbira juwa jiwinibarabʉta ewari jõma ʉ̃na erbaita. 21 Aarónta akʉza yi wũãwũãrabawaraʉba akʉibarabasi karpa ãba yi jʉrebari dera ĩbirabʉta, maʉ̃ra basi wua jirabʉ ãbʉdeare Testimonio k’awa, maʉ̃ra koabaibarabasi Jeowaba nãã kewarareba diapedabayeda. Naʉ̃ k’ãwũã zok’adara israelitaraba akʉza israelitaraneba zebʉrʉraba k’ãwũã opanaibarabasi ewari jõmaʉ̃nẽ.